નવી દિલ્હી : ભારતીય ક્રિકેટના ઈતિહાસમાં ૨૮ વર્ષ પછી એક અત્યંત રોમાંચક અને અનોખો સંયોગ આકાર લેવા જઈ રહ્યો છે. આવનારી ૩ ઓક્ટોબર, ૨૦૨૬ ના રોજ ભારતીય ક્રિકેટ ટીમ એક જ દિવસે બે અલગ-અલગ દેશોમાં બે વિભિન્ન આંતરરાષ્ટ્રીય મેચ રમતી જોવા મળી શકે છે. આ પહેલા આવો ઐતિહાસિક ક્ષણ ૧૨ સપ્ટેમ્બર ૧૯૯૮ ના રોજ બન્યો હતો, જ્યારે એક ભારતીય ટીમે કોમનવેલ્થ ગેમ્સમાં અને બીજી ટીમે પાકિસ્તાન સામે સહારા કપમાં મેચ રમી હતી.

આ અંગે મળતી વિગતો મુજબ, ૩ ઓક્ટોબરે ભારતની એક ટીમ મુલ્લાનપુરમાં વેસ્ટ ઈન્ડિઝ સામેની ત્રણ મેચની વન-ડે (ODI) શ્રેણીની અંતિમ મેચ રમશે. જ્યારે બીજી તરફ શ્રેયસ અય્યરના કેપ્ટનપદ હેઠળની ભારતીય ટીમ જાપાન ખાતે યોજાનારી એશિયન ગેમ્સમાં ક્રિકેટ સ્પર્ધાના ગોલ્ડ અથવા બ્રોન્ઝ મેડલ માટે મેદાનમાં ઉતરશે. ભારતીય ટીમ એશિયન ગેમ્સમાં સીધી ક્વાર્ટર ફાઇનલમાં પહોંચી છે અને ૨૮ સપ્ટેમ્બરે પોતાની પ્રથમ મેચ રમશે.

આ બંને શ્રેણીઓ માટે બે અલગ-અલગ ટીમો તૈયાર કરવામાં આવી છે. એશિયન ગેમ્સ માટે જાહેર કરાયેલી ટીમમાં સંજુ સેમસન, ઈશાન કિશન, જસપ્રીત બુમરાહ, અભિષેક શર્મા અને તિલક વર્મા જેવા સ્ટાર ખેલાડીઓનો સમાવેશ થાય છે, જેઓ વેસ્ટ ઈન્ડિઝ સામેની વન-ડે શ્રેણીમાં ઉપલબ્ધ રહેશે નહીં. આ નિર્ણયથી ભારતીય ક્રિકેટની વિશાળ ખેલાડી ક્ષમતા (Bench Strength) વૈશ્વિક મંચ પર સાબિત થશે.