નવી દિલ્હી : ઘરેલુ ક્રિકેટ અને ઇન્ડિયન પ્રીમિયર લીગ (IPL) માં પોતાની ધારદાર બોલિંગથી ધમાલ મચાવ્યા બાદ વિદર્ભના ૨૭ વર્ષીય ઝડપી બોલર યશ ઠાકુરે શનિવારે આંતરરાષ્ટ્રીય ક્રિકેટમાં પોતાનું પદાર્પણ કર્યું છે. ઝિમ્બાબ્વે સામેની ત્રણ મેચોની T20 આંતરરાષ્ટ્રીય શ્રેણીની બીજી મેચમાં ભારતીય પ્લેઇંગ-૧૧માં યશ ઠાકુરનો સમાવેશ કરવામાં આવ્યો છે. હરારે સ્પોર્ટ્સ ક્લબ ખાતે ટોસ સમયે કેપ્ટન શ્રેયસ અય્યરે જાહેરાત કરી હતી કે અશોક શર્માના સ્થાને યશ ઠાકુરને ટીમમાં સામેલ કરવામાં આવ્યો છે.

યશ ઠાકુરને ભારતીય ટીમ તરફથી ડેબ્યૂ કરવાની તક તેના ઉત્કૃષ્ટ ઘરેલુ અને IPL ટ્રેક રેકોર્ડના આધારે મળી છે. આંતરરાષ્ટ્રીય ડેબ્યૂ પહેલા યશે ૭૪ T20 મેચોની ૭૪ ઇનિંગ્સમાં ૧૧૦ વિકેટો ઝડપી છે. આ સિવાય તેણે IPL માં લખનૌ સુપર જાયન્ટ્સ અને પંજાબ કિંગ્સ વતી ૨૨ મેચો રમીને ૨૭ વિકેટો પોતાના નામે કરી છે. તે લિસ્ટ-A અને ફર્સ્ટ ક્લાસ ક્રિકેટમાં પણ વિદર્ભ તરફથી સતત સાતત્યપૂર્ણ પ્રદર્શન કરતો રહ્યો છે, જ્યાં તેણે અનુક્રમે ૯૦ અને ૯૩ વિકેટો મેળવી છે.

તાજેતરમાં જ યોજાયેલી ભારત A ના શ્રીલંકા પ્રવાસ દરમિયાન પણ યશ ઠાકુરે પોતાના સ્પેલથી ભારે પ્રભાવિત કર્યા હતા. શ્રીલંકામાં ત્રિકોણીય શ્રેણી દરમિયાન તેણે ૩ મેચોમાં ૫ વિકેટો અને બે બિનસત્તાવાર ટેસ્ટ મેચોમાં ૫ વિકેટો ઝડપીને પસંદગીકારોનું ધ્યાન ખેંચ્યું હતું. પ્રથમ મેચમાં વિકેટ મેળવવામાં નિષ્ફળ રહેલા અશોક શર્માના સ્થાને તક મળતાં જ યશ ઠાકુરે આંતરરાષ્ટ્રીય મંચ પર પોતાનું કૌશલ્ય સાબિત કરવા માટે કમર કસી લીધી છે.