દુબઈ: મહિલા ટી૨૦ એશિયા કપ ૨૦૨૬ માં ભારત અને હોંગકોંગ વચ્ચે રમાયેલી મેચ દરમિયાન સ્ટમ્પ નજીક દોરવામાં આવેલી એક લાલ લાઈને ક્રિકેટપ્રેમીઓનું ધ્યાન ખેંચ્યું હતું. આ માર્કિંગ આઈસીસી (ઇન્ટરનેશનલ ક્રિકેટ કાઉન્સિલ) દ્વારા વ્હાઈટ-બોલ ક્રિકેટમાં લેગ-સાઈડ વાઈડ બોલના યોગ્ય મૂલ્યાંકન માટે દાખલ કરવામાં આવેલા નવા અને અદ્યતન નિયમ સાથે સંકળાયેલું છે. આ ફેરફારનો મુખ્ય હેતુ લેગ સ્ટમ્પ અને ચોક્કસ માર્કિંગ એરિયા વચ્ચેથી પસાર થતા બોલને વાઈડ જાહેર કરવો કે નહીં તેનો સ્પષ્ટ સંદર્ભ અમ્પાયરોને પૂરો પાડવાનો છે.

આઈસીસીના નવા નિયમ અનુસાર, પોપિંગ ક્રિઝ પર લેગ સ્ટમ્પ અને પ્રોટેક્ટેડ-એરિયા માર્કરની વચ્ચેથી પસાર થતા બોલને હવે વાઈડ આપવામાં આવશે નહીં. અમ્પાયરો માટે દ્રશ્યમાન ગાઈડલાઈન બની રહે તે હેતુથી પ્રોટેક્ટેડ-એરિયા લાઈનને પોપિંગ ક્રિઝ સુધી લંબાવીને લાલ રંગથી અંકિત કરવામાં આવી છે.

કેવી રીતે કામ કરશે નવો વાઈડ બોલ નિયમ? નવા નિયમ હેઠળ મુખ્ય ફેરફાર લેગ સાઈડ પર કરવામાં આવ્યો છે. મિડલ સ્ટમ્પથી બરાબર એક ફૂટ (૩૦.૪૮ સેમી) ના અંતરે આ વધારાની લાઈન દોરવામાં આવી છે. આ લાઈન લેગ સ્ટમ્પ અને પ્રોટેક્ટેડ-એરિયા માર્કર વચ્ચે એક રેફરન્સ એરિયા બનાવે છે. જો બોલ આ વિસ્તારમાંથી પસાર થશે તો તેને વાઈડ ગણવામાં આવશે નહીં. જોકે, બેટ્સમેનના પગની પાછળથી અને આ નવી ગાઈડલાઈનની બહારથી જતો બોલ પૂર્વવત રીતે વાઈડ જ ગણાશે.

આ ઉપરાંત, બોલર બોલ ફેંકે તે પહેલાં બેટ્સમેન ક્રિઝમાં ઓફ સાઈડ તરફ ખસે (શફલ થાય) છે કે નહીં તે બાબતને પણ ધ્યાનમાં લેવામાં આવશે. જો બેટ્સમેન પોઝિશન બદલશે તો બોલ ડિલિવરી સમયે તેના પગની સ્થિતિને આધારે રેફરન્સ પોઈન્ટ નક્કી થશે. બેટ્સમેનો ક્રિઝમાં મુવમેન્ટ કરીને લેગ સાઈડ પર વધારાની જગ્યા બનાવતા હોવાથી અમ્પાયરો માટે ઊભી થતી દ્વિધા દૂર કરવા આઈસીસી બોર્ડ દ્વારા જૂન ૨૦૨૬ માં આ નિયમને કાયમી ધોરણે મંજૂરી આપવામાં આવી હતી.