મુંબઈ, તા.૩૧: ભારતીય ક્રિકેટ જગતમાં તે સમયે મોટો ભૂકંપ આવ્યો જ્યારે ટી20 વર્લ્ડ કપ વિજેતા સુકાની સૂર્યકુમાર યાદવને અચાનક જ ભારતની T20I ટીમમાંથી બહારનો રસ્તો બતાવી દેવાયો. આગામી ૨૦૨૮ ઓલિમ્પિક્સ અને ટી20 વર્લ્ડ કપ માટે ટીમને આગળ લઈ જવાનું સપનું જોઈ રહેલા ૩૫ વર્ષીય સૂર્યા માટે આ નિર્ણય એક ભારે આંચકારૂપ હતો. હાલમાં જ આકાશ ચોપરાના જાણીતા શો 'બેથ એન્ડ બોલ'માં ખાસ વાતચીત દરમિયાન સૂર્યકુમારે પોતાના દિલનો અવાજ રજૂ કર્યો હતો.

"મારું નામ ન જોઈને હું બસ હસી પડ્યો"

સૂર્યકુમારે દિલ ખોલીને વાત કરતાં જણાવ્યું કે, જૂનમાં આયર્લેન્ડ અને ઇંગ્લેન્ડ શ્રેણી માટે જ્યારે ટીમની પસંદગી થઈ ત્યારે ટીમના જાહેરાતના બે-ત્રણ દિવસ પહેલાં પસંદગીકારોએ તેમને ફોન કરીને કહ્યું કે 'હવે આગળ વધવાનો સમય આવી ગયો છે.' સૂર્યાએ કહ્યું, "ટીમ લિસ્ટમાં મારું નામ ન જોઈને હું બસ હસી પડ્યો. મને નહોતું લાગતું કે ૨૦૨૬માં જ મારી સાથે આવું થશે. મને એમ હતું કે હું આગામી બે વર્ષ માટે ટીમને આગળ લઈ જઈશ - ઓલિમ્પિક્સ અને પછીનો વર્લ્ડ કપ. પણ પસંદગીકારોએ નિર્ણય લઈ લીધો હતો."

સતત વિજય રથ છતાં આટલો મોટો ફેરફાર શા માટે?

સૂર્યાના નેતૃત્વ હેઠળ ભારતે પચાસમાંથી ૪૨ T20 મેચો જીતી અને સતત બે વર્ષ સુધી એક પણ ટી20 શ્રેણી હાર્યું નહોતું. સૂર્યાએ ભાવુક થઈને ઉમેર્યું, "જેને કેપ્ટન બનાવવામાં આવ્યો છે (શ્રેયસ ઐયર), તેની સાથે મેં ઘણું ક્રિકેટ રમ્યું છે અને તે સારો ખેલાડી છે. પણ હું નિરાશ ચોક્કસ થયો, કારણ કે જ્યારે બધું જ બરાબર ચાલી રહ્યું હતું, અમે એક પણ શ્રેણી હાર્યા નહોતા, એશિયા કપ અને વર્લ્ડ કપ જીત્યા હતા - તો પછી બધું સારું ચાલતું હોવા છતાં આ ફેરફાર શા માટે?"

IPL નું ખરાબ ફોર્મ અને પસંદગીકારોનું વલણ

મુખ્ય પસંદગીકાર અજિત અગરકરે આ અંગે સ્પષ્ટતા કરતાં કહ્યું હતું કે, આગામી બે વર્ષના ચક્રને ધ્યાનમાં રાખીને અને સૂર્યાના હાલના ફોર્મને જોઈને આગળ વધવાનો આ શ્રેષ્ઠ સમય હતો. વર્લ્ડ કપમાં ૨૪૨ રન બનાવ્યા બાદ IPL 2026 માં સૂર્યા મુંબઈ ઈન્ડિયન્સ માટે માત્ર ૨૭૦ રન જ બનાવી શક્યો હતો.

"દોઢ મહિના સુધી આઘાતમાંથી બહાર ન આવી શક્યો"

સૂર્યાએ સ્વીકાર્યું કે આ નિર્ણય પચાવવો તેના માટે ખૂબ જ મુશ્કેલ હતો. "દોઢ મહિના સુધી હું વિચારતો રહ્યો કે આ કેવી રીતે શક્ય બને? પરિવાર અને મિત્રોએ મને દિલાસો આપ્યો." જોકે, આંચકા છતાં સૂર્યકુમારે હાર માની નથી. તેણે સ્પષ્ટ કર્યું કે તે હજુ પણ રમવા માટે સંપૂર્ણ તૈયાર છે અને જ્યારે પણ દેશને તેની જરૂર પડશે, તે મેદાનમાં વાપસી કરવા આતુર છે.