લંડન તા.28: ઐતિહાસિક લોર્ડ્સ ક્રિકેટ ગ્રાઉન્ડ ખાતે પાકિસ્તાન અને ઇંગ્લેન્ડ વચ્ચે શરૂ થયેલી પ્રથમ ટેસ્ટ મેચના પ્રથમ જ દિવસે પાકિસ્તાની ફાસ્ટ બોલરોએ યજમાન ટીમ સામે શાનદાર પ્રદર્શન કરી રમત પર સંપૂર્ણ વર્ચસ્વ જમાવી દીધું છે. વરસાદથી ખોરવાયેલા પ્રથમ દિવસના અંતે મોહમ્મદ અબ્બાસની શિસ્તબદ્ધ લાઇન-લેન્થ અને મોહમ્મદ અલીના વિસ્ફોટક સ્પેલની મદદથી પાકિસ્તાને ઇંગ્લેન્ડની 9 વિકેટ માત્ર 248 રન પર પાડી દીધી છે. ખરાબ પ્રકાશના કારણે 56 ઓવરની રમત રમાયા બાદ દિવસની રમત વહેલી સ્થગિત કરી દેવામાં આવી હતી.

ટોસ જીતીને વાદળછાયા વાતાવરણમાં પાકિસ્તાની કેપ્ટન બાબર આઝમે પ્રથમ બોલિંગ કરવાનો નિર્ણય લીધો હતો, જે અબ્બાસે યોગ્ય સાબિત કરી બતાવ્યો હતો. અબ્બાસે શરૂઆતમાં જ શાનદાર સ્વિંગ બોલિંગથી ઇંગ્લિશ ઓપનરોને થથરાવી મૂક્યા હતા. તેણે સૌથી પહેલા એમિલિયો ગેને મોહમ્મદ રિઝવાનના હાથે કેચ કરાવી આઉટ કર્યો હતો. ત્યારબાદ બેન ડકેટને LBW આઉટ કરીને પોતાની ફર્સ્ટ ક્લાસ કરિયરની 900મી વિકેટ ઝડપી હતી. દિવસની સૌથી મોટી સફળતા અબ્બાસને ત્યારે મળી જ્યારે તેણે ઇન-ડિપર બોલ પર સ્ટાર બેટ્સમેન જો રૂટને પેવેલિયન ભેગો કરી દીધો હતો.

બીજી તરફ, જોર્ડન કોક્સ (55 રન) અને જેમી સ્મિથ (61 રન)ની અડધી સદીઓએ ઇંગ્લેન્ડને રમતમાંથી બહાર થતાં થોડા સમય માટે બચાવ્યું હતું. બંને વચ્ચે મજબૂત ભાગીદારી આકાર લઈ રહી હતી, પરંતુ વિકેટકીપર રિઝવાનના કેટલાક ડ્રોપ કેચ છતાં પાકિસ્તાની બોલરોએ વાપસી કરી હતી. દિવસના અંતિમ સત્રમાં મોહમ્મદ અલીએ ઘાતક બોલિંગ કરી જેમી સ્મિથ અને ઓલી રોબિન્સનને એક જ ઓવરમાં આઉટ કરીને ઇંગ્લેન્ડની કમર ભાંગી નાખી હતી.

ત્યારબાદ અબ્બાસે જોફ્રા આર્ચરને ક્લીન બોલ્ડ કરીને ઇંગ્લેન્ડને મોટો ફટકો આપ્યો હતો. પ્રથમ દિવસની રમત પૂરી થઈ ત્યારે ઇંગ્લેન્ડનો સ્કોર 9 વિકેટે 248 રન હતો, જેમાં મોહમ્મદ અબ્બાસે 56 રનમાં 4 વિકેટ અને મોહમ્મદ અલીએ 67 રનમાં 3 વિકેટ ઝડપીને પાકિસ્તાનને મજબૂત સ્થિતિમાં લાવી દીધું છે.