બેંગલુરુ : સેન્ટર ઓફ એક્સેલન્સ ગ્રાઉન્ડ ૧ ખાતે રમાઈ રહેલી દુલીપ ટ્રોફીની બીજી ક્વાર્ટર ફાઇનલમાં ઉત્તર ઝોને શાનદાર પ્રદર્શન કરતા પશ્ચિમ ઝોનને ૫૨ રનથી હરાવીને જીતનો સ્વાદ ચાખ્યો છે. ચોથા દિવસની સવારે પશ્ચિમ ઝોનને જીતવા માટે માત્ર ૬૭ રનની જરૂર હતી અને તેમના ૩ ખેલાડીઓ બાકી હતા, પરંતુ ઉત્તર ઝોનના બોલરોએ માત્ર સાત ઓવરની અંદર જ મેચની બાજી પલટી નાખી હતી.

ચોથા દિવસનો રોમાંચ અને મુશ્તાકનો જાદુ

ચોથા દિવસે ૨૨૦/૭ના સ્કોરથી આગળ રમવા ઉતરેલી પશ્ચિમ ઝોનની ટીમને ઉર્વિલ પટેલ અને તનુષ કોટિયન પાસેથી ઘણી આશાઓ હતી. પરંતુ દિવસની બીજી જ ઓવરમાં આબિદ મુશ્તાકે કોટિયનને આઉટ કરીને ઝટકો આપ્યો. ત્યારબાદ મુશ્તાકે તુષાર દેશપાંડેને પણ પેવેલિયન ભેગો કર્યો, અને છેલ્લે નિશાંત સિંધુએ ઉર્વિલ પટેલને LBW આઉટ કરી ઉત્તર ઝોનની જીત પર મહોર લગાવી દીધી. આબિદ મુશ્તાકે આખી મેચમાં ૯ વિકેટ (પ્રથમ દાવમાં ૫ અને બીજા દાવમાં ૪) ઝડપીને હીરો સાબિત થયો હતો.

ઉત્તર ઝોનનો પડકાર અને પશ્ચિમ ઝોનની લડત

મેચની શરૂઆતમાં ઉત્તર ઝોને અંશુલ કંબોજ (૬૦) અને આયુષ બદોની (૫૧)ની મદદથી પ્રથમ ઇનિંગ્સમાં ૨૫૧ રન બનાવ્યા હતા. પશ્ચિમ ઝોન તરફથી તનુષ કોટિયન અને તુષાર દેશપાંડેએ ૪-૪ વિકેટ લીધી હતી. જવાબમાં પશ્ચિમ ઝોન શમ્સ મુલાનીની અડધી સદી છતાં મુશ્તાકની ઘાતક બોલિંગ (૫ વિકેટ) સામે માત્ર ૧૮૭ રનમાં ઓલઆઉટ થઈ ગયું હતું, જેથી ઉત્તર ઝોનને ૬૪ રનની મહત્ત્વપૂર્ણ લીડ મળી હતી.

બીજા દાવમાં આયુષ બદોની (૫૦) અને નિશાંત સિંધુ (૪૪)ના જોરે ઉત્તર ઝોને ૨૨૨ રન બનાવી પશ્ચિમ ઝોનને ૨૮૭ રનનો ટાર્ગેટ આપ્યો હતો.

મુશીર અને ગાયકવાડની ભાગીદારી એળે ગઈ

લક્ષ્યનો પીછો કરવા ઉતરેલા પશ્ચિમ ઝોને પોતાના બંને ઓપનર જલ્દી ગુમાવ્યા હતા. ત્યારબાદ મુશીર ખાન (૯૬) અને કેપ્ટન રુતુરાજ ગાયકવાડ (૬૬) વચ્ચે ૧૧૧ રનની શાનદાર ભાગીદારી નોંધાઈ હતી, જેણે પશ્ચિમ ઝોનની આશા જીવંત રાખી હતી. પરંતુ ગાયકવાડના કમનસીબ રનઆઉટ બાદ પશ્ચિમ ઝોનની ઇનિંગ્સ પત્તાના મહેલની જેમ ધરાશાયી થઈ ગઈ અને બાકીની ૭ વિકેટ માત્ર ૩૯ રનમાં જ પડી ગઈ હતી.

સંક્ષિપ્ત સ્કોર બોર્ડ:

ઉત્તર ઝોન: ૨૫૧ રન અને ૨૨૨ રન

• પશ્ચિમ ઝોન: ૧૮૭ રન અને ૨૩૪ રન (ઉત્તર ઝોનની ૫૨ રને જીત)