નવી દિલ્હી : કોલંબો ખાતે શ્રીલંકા સામેની બીજી અને નિર્ણાયક ટેસ્ટ મેચ રમવા ઉતરે તે પહેલાં ભારતીય ક્રિકેટ ટીમના મુખ્ય કોચ ગૌતમ ગંભીરે ટીકાકારો અને સોશિયલ મીડિયાના વાતાવરણ પર આકરા પ્રહારો કર્યા છે. તાજેતરના પ્રદર્શન અને રેન્કિંગ અંગે ઉઠેલા સવાલોનો વળતો જવાબ આપતાં તેમણે બેટૂક શબ્દોમાં જણાવ્યું હતું કે તેમનું કામ સોશિયલ મીડિયા પર લાઇક્સ કે વ્યૂઝ મેળવવાનું નથી, પરંતુ ભારતીય ટીમ માટે આંતરરાષ્ટ્રીય ટ્રોફીઓ જીતવાનું છે.

​સિંહાલીઝ સ્પોર્ટ્સ ક્લબ ખાતે યોજાનારી મેચ પૂર્વે પત્રકાર પરિષદને સંબોધતા ગંભીરે સ્પષ્ટતા કરી કે ટીમ ઈન્ડિયા ટેસ્ટ ક્રિકેટમાં કોઈ સંઘર્ષ કરી રહી નથી. રોહિત શર્મા, વિરાટ કોહલી અને રવિચંદ્રન અશ્વિન જેવા અનુભવી ખેલાડીઓની નિવૃત્તિ બાદ ટીમ હાલમાં સંક્રમણ (ટ્રાન્ઝિશન) ના તબક્કામાંથી પસાર થઈ રહી છે. આવા સમયે રમતમાં ઉતાર-ચઢાવ આવવો સ્વાભાવિક છે. તેમણે ઉમેર્યું કે ઈંગ્લેન્ડ પ્રવાસ બાદથી ભારતીય ટીમે ટેસ્ટ ફોર્મેટમાં સાતત્યપૂર્ણ રમતો દર્શાવી છે, તેથી આઈસીસી રેન્કિંગ તેમના માટે બહુ મહત્વ ધરાવતું નથી.

​પસંદગી સમિતિના અધ્યક્ષ અજિત અગરકર સાથેના તાલમેલ અંગે વાત કરતા તેમણે કહ્યું કે બન્ને વચ્ચે માત્ર ભારતીય ક્રિકેટના ઉત્કૃષ્ટ ભવિષ્ય અને યોગ્ય નિર્ણયો લેવા અંગે જ ચર્ચા થાય છે. આ સિવાય બહાર ચાલી રહેલા શોરબકોર કે બિનજરૂરી ચર્ચાઓથી તેમને કોઈ ફરક પડતો નથી.

​યંગ પ્લેયર્સ અંગે ગંભીરે જણાવ્યું કે શુભમન ગિલ કપ્તાનીની જવાબદારી સારી રીતે સંભાળી રહ્યો છે, જ્યારે નંબર-૩ પર દેવદત્ત પડિક્કલ અને સ્પિન વિભાગમાં માનવ સુથાર જેવા યુવાનોને લાંબા ગાળાની તકો આપવામાં આવશે. માત્ર એક કે બે મેચના પ્રદર્શન આધારે કોઈ ખેલાડીનું ભવિષ્ય નક્કી ન કરી શકાય.

​મેચ જીતવાની રણનીતિ પર પ્રકાશ પાડતા કોચે જણાવ્યું કે ટેસ્ટ મેચમાં ૧૦૦૦ રન બનાવવાથી પણ જીતની ગેરંટી મળતી નથી, પરંતુ વિરોધી ટીમના ૨૦ વિકેટ લેવાથી જ જીત શક્ય બને છે. તેથી પિચ અને પરિસ્થિતિ મુજબ ૨૦ વિકેટ ઝડપી શકે તેવા શ્રેષ્ઠ બોલિંગ કોમ્બિનેશનને જ પ્લેઇંગ-૧૧માં સ્થાન મળશે.

​આ ઉપરાંત બે મેચોની ટેસ્ટ શ્રેણી અંગે પોતાનો અભિપ્રાય આપતાં ગંભીરે કહ્યું કે તેમના મતે ૩ ટેસ્ટ મેચોની શ્રેણી સૌથી આદર્શ ફોર્મેટ છે. જો કોઈ ટીમ પહેલી મેચ હારી જાય તો તેને પુનરાગમન કરવા માટે ૩ મેચોની સિરીઝમાં પૂરતી તક મળે છે, જ્યારે ૨ મેચની શ્રેણીમાં પહેલી મેચ ગુમાવ્યા બાદ માત્ર ડ્રો કરવાનો જ વિકલ્પ બચે છે. ગૌલ ખાતે રમાયેલી પહેલી ટેસ્ટ મેચમાં ૧૬૫ રનથી મેળવેલી જીત બાદ ટીમનો ઉત્સાહ બુલંદ છે અને કોલંબો ટેસ્ટ જીતીને સિરીઝ ૨-૦થી પોતાના નામે કરવા ભારત તૈયાર છે.