રમતગમત મંત્રાલયે ટેબલ ટેનીસ ફેડરેશનની માન્યતા સ્થગિત કરી
IOA ને એડહોક કમિટી બનાવવાનો આદેશ
નવી દિલ્હી, તા., ૧૩ : ભારતીય ટેબલ ટેનિસના વહીવટ અંગે રમતગમત મંત્રાલયે બુધવારે એક અત્યંત મહત્વપૂર્ણ અને કડક નિર્ણય લીધો છે.
મંત્રાલયે ટેબલ ટેનિસ ફેડરેશન ઓફ ઈન્ડિયા (TTFI) ની માન્યતા તુરંત અસરથી સ્થગિત કરી દીધી છે. આ નિર્ણય પાછળનું મુખ્ય કારણ ફેડરેશનમાં લાંબા સમયથી ચાલી રહેલી શાસન સંબંધિત ગંભીર ખામીઓ અને સમયસર ચૂંટણીઓ યોજવામાં મળેલી નિષ્ફળતા છે.
મંત્રાલય દ્વારા અગાઉ TTFI ને કારણ બતાવો નોટિસ જારી કરવામાં આવી હતી, પરંતુ ફેડરેશન દ્વારા આપવામાં આવેલો જવાબ ‘અસંતોષકારક' માલૂમ પડતાં આ આકરાં પગલાં લેવામાં આવ્યા છે.
મંત્રાલયની કાર્યવાહીમાં સૌથી નિર્ણાયક મુદ્દો TTFI દ્વારા સમયસર લોકશાહી ઢબે ચૂંટણી યોજવામાં મળેલી નિષ્ફળતા રહી છે. એપ્રિલ ૨૦૨૬ માં ‘ધ ન્યૂ ઈન્ડિયન એક્સપ્રેસ' ના એક અહેવાલમાં પણ ફેડરેશનમાં ચાલી રહેલા તીવ્ર સત્તા સંઘર્ષ અને વરિષ્ઠ અધિકારીઓ વચ્ચેના ઉંડા મતભેદોનો પર્દાફાશ કરવામાં આવ્યો હતો.
ખાસ કરીને ફેડરેશનના પ્રમુખ અને મહાસચિવ વચ્ચેના આંતરિક વિવાદોને કારણે સંસ્થાનું કામકાજ સંપૂર્ણપણે ખોરવાઈ ગયું હતું.
કારણદર્શક નોટિસનો યોગ્ય ખુલાસો ન આપી શકવાને કારણે મંત્રાલય પાસે માન્યતા સ્થગિત કરવા સિવાય અન્ય કોઈ વિકલ્પ બચ્યો નહોતો.
TTFI ની માન્યતા રદ કરવાની સાથે જ રમતગમત મંત્રાલયે ભારતીય ઓલિમ્પિક એસોસિએશન (IOA) ને દેશમાં ટેબલ ટેનિસના રોજિંદા વહીવટને સુચારુ રૂપે ચલાવવા માટે એક અસ્થાયી ‘એડહોક કમિટી' ગઠિત કરવાનો આદેશ આપ્યો છે.
(3:33 PM IST)
છેલ્લા 8 દિવસમાં સૌથી લોકપ્રિય 
