નવી દિલ્હી: તા.12 ઇન્ટરનેશનલ ક્રિકેટ કાઉન્સિલ (ICC) દ્વારા પુરુષ ખેલાડીઓની તાજેતરની રેન્કિંગ જાહેર કરવામાં આવી છે, જેમાં ક્રિકેટ જગતમાં અનેક રસપ્રદ ફેરફારો જોવા મળ્યા છે. પાકિસ્તાન ક્રિકેટ ટીમના કેપ્ટન બાબર આઝમે પાંચ સ્થાનની મોટી છલાંગ લગાવીને ટેસ્ટ બેટ્સમેનોની યાદીમાં ૧૦મું સ્થાન મેળવ્યું છે. આ સાથે જ તેનો ટેસ્ટ રેન્કિંગના ટોપ-10 માં વાપસી કરવાનો બે વર્ષ લાંબો ઇંતેજાર પૂર્ણ થયો છે. તાજેતરમાં વેસ્ટ ઈન્ડિઝ સામે રમાયેલી બે મેચની ટેસ્ટ શ્રેણીમાં પાકિસ્તાને બીજી ટેસ્ટ ૮ વિકેટે જીતીને શ્રેણી ૧-૧ થી બરાબર કરી હતી, જેમાં બાબરે પ્રથમ ઇનિંગમાં ૮૮ અને બીજી ઇનિંગમાં અણનમ ૨૪ રન બનાવીને મહત્ત્વની ભૂમિકા ભજવી હતી.

આ સિવાય વેસ્ટ ઈન્ડિઝ સામે ઓપનિંગમાં અદ્ભુત બેટિંગ કરનાર પાકિસ્તાનના અબ્દુલ્લાહ શફીકે ૨૫ સ્થાનનો મોટો કુદકો મારીને ૩૨મું સ્થાન હાંસલ કર્યું છે, તેણે શ્રેણીમાં અણનમ ૧૬૦ રનની શાનદાર ઇનિંગ રમી હતી. હાલમાં ઓસ્ટ્રેલિયાનો ટ્રેવિસ હેડ ટેસ્ટ બેટિંગ રેન્કિંગમાં પ્રથમ સ્થાને વિરાજમાન છે, જ્યારે ઈંગ્લેન્ડના હેરી બ્રુક અને જો રૂટ અનુક્રમે બીજા અને ત્રીજા સ્થાને છે. ભારત તરફથી યુવા વિસ્ફોટક ઓપનર યશસ્વી જયસ્વાલ ટોપ-10 માં સ્થાન ધરાવનાર એકમાત્ર ભારતીય બેટ્સમેન છે, જે નવમા ક્રમે છે.

બીજી તરફ, વન-ડે રેન્કિંગમાં અફઘાનિસ્તાનના ઓપનર રહેમાનુલ્લાહ ગુરબાઝ ૩ સ્થાન સુધારીને ૧૧મા સ્થાને પહોંચી ગયા છે, જ્યારે તેમના કેપ્ટન અને સ્ટાર સ્પિનર રાશિદ ખાન વન-ડે બોલરોની યાદીમાં ટોચના સ્થાને મજબૂત રીતે કાયમ છે. આયર્લેન્ડ સામેની વન-ડે શ્રેણીમાં અફઘાનિસ્તાન હાલ ૨-૦ થી આગળ ચાલી રહ્યું છે.

આંતરરાષ્ટ્રીય ક્રિકેટના તમામ ફોર્મેટમાં ભારતીય ખેલાડીઓનો જબરદસ્ત દબદબો જોવા મળી રહ્યો છે, જ્યાં ચાર અલગ-અલગ ફોર્મેટ/કેટેગરીમાં ભારતીય ખેલાડીઓ વર્લ્ડ નંબર ૧ ના તાજ પર બિરાજમાન છે. T20I બેટિંગમાં ઈશાન કિશન નંબર ૧ સ્થાન પર છે, જ્યારે ODI બેટિંગ રેન્કિંગમાં ભારતીય કેપ્ટન શુભમન ગિલ શીર્ષ સ્થાને છે. ટેસ્ટ ઓલરાઉન્ડરોની યાદીમાં રવિન્દ્ર જાડેજા અને ટેસ્ટ બોલરોની યાદીમાં ભારતીય ફાસ્ટ બોલિંગના સુપરસ્ટાર જસપ્રીત બુમરાહ નંબર ૧ પર કાયમ છે. ભારત અને શ્રીલંકા વચ્ચે આગામી દિવસોમાં શરૂ થનારી ટેસ્ટ શ્રેણીમાં આ ભારતીય સ્ટાર્સ પર ચાહકોની નજર રહેશે.