મેલબોર્ન : ઓસ્ટ્રેલિયાના વિસ્ફોટક ટેસ્ટ ઓપનર ટ્રેવિસ હેડે ફરી એકવાર ક્રિકેટ જગતમાં પોતાનો ડંકો વગાડતા સતત બીજી વખત ઓસ્ટ્રેલિયન ક્રિકેટનો સર્વોચ્ચ પુરુષ એવોર્ડ 'એલન બોર્ડર મેડલ' પોતાના નામે કર્યો છે. અત્યંત રોમાંચક રહેલા આ વોટિંગમાં હેડે વિકેટકીપર બેટ્સમેન એલેક્સ કેરીને માત્ર ૧ મત અને સ્ટાર ફાસ્ટ બોલર મિશેલ સ્ટાર્કને ૩ મતોના નજીવા અંતરથી પાછળ છોડીને આ ઐતિહાસિક સિદ્ધિ મેળવી છે. આ સાથે જ ટ્રેવિસ હેડ એકથી વધુ વખત આ મેડલ જીતનાર રિકી પોન્ટિંગ, માઈકલ ક્લાર્ક, સ્ટીવ સ્મિથ, ડેવિડ વોર્નર અને શેન વોટસન જેવા મહાન ખેલાડીઓની એલિટ ક્લબમાં સામેલ થઈ ગયો છે.

ટ્રેવિસ હેડ માટે આ વર્ષ એશિઝ શ્રેણીથી લઈને વન-ડે સુધી શાનદાર પ્રદર્શનથી ભરેલું રહ્યું હતું. તેણે એશિઝમાં ૮૭.૩૬ ના વિસ્ફોટક સ્ટ્રાઈક રેટથી ૩ સદીઓ સાથે ૬૨૯ રન બનાવ્યા હતા, જેમાં પર્થ ટેસ્ટમાં રન ચેઝ દરમિયાન માત્ર ૮૩ બોલમાં રમેલી ૧૨૩ રનની મેચ-વિનિંગ ઇનિંગ્સ સામેલ છે. હેડે સમગ્ર સીઝનમાં ૧૧ ટેસ્ટ મેચોમાં કુલ ૯૭૧ રન ફટકાર્યા હતા. ખાસ વાત એ રહી કે આ વખતે દંતકથા સમાન એલન બોર્ડરે પોતે બ્રિસ્બેનમાં આયોજિત એક કાર્યક્રમમાં હેડને આ મેડલ એનાયત કર્યો હતો.

બીજી તરફ, સમગ્ર મતદાન સમયગાળા દરમિયાન ૧૭.૮૦ ની અદ્ભુત સરેરાશથી ૫૨ વિકેટો ઝડપનાર અનુભવી ફાસ્ટ બોલર મિશેલ સ્ટાર્કને 'શેન વોર્ન ટેસ્ટ પ્લેયર ઓફ ધ યર' જાહેર કરવામાં આવ્યો હતો. સ્ટાર્કે એશિઝ સિરીઝમાં ૩૧ વિકેટો અને જમૈકામાં વેસ્ટ ઈન્ડિઝ સામે ૯ રનમાં ૬ વિકેટ લઈને પોતાની ૧૦૦મી ટેસ્ટમાં ૪૦૦ વિકેટ પૂરી કરવાનો ઐતિહાસિક રેકોર્ડ બનાવ્યો હતો. આ સિવાય ઓલરાઉન્ડર મિશેલ માર્શને 'ODI પ્લેયર ઓફ ધ યર' અને વિસ્ફોટક બેટ્સમેન ટિમ ડેવિડને 'T20 પ્લેયર ઓફ ધ યર' ના એવોર્ડથી નવાજવામાં આવ્યા હતા.