મેલબોર્ન: આંતરરાષ્ટ્રીય ક્રિકેટના મેદાન પરથી એક અત્યંત રોમાંચક અને પ્રેરણાદાયી સમાચાર સામે આવ્યા છે. ભારતના દિલ્હીમાં જન્મેલા અને ભૂતકાળમાં પંજાબ તરફથી સ્થાનિક ક્રિકેટ રમી ચૂકેલા પ્રતિભાશાળી ઓલરાઉન્ડર નિખિલ ચૌધરીને ઓસ્ટ્રેલિયાની રાષ્ટ્રીય ક્રિકેટ ટીમ તરફથી પ્રથમ વખત આંતરરાષ્ટ્રીય સ્તરે રમવાનું આમંત્રણ (કોલ-અપ) મળ્યું છે. બાંગ્લાદેશ સામે રમાનારી ત્રણ મેચોની T20I શ્રેણી માટે ઓસ્ટ્રેલિયાની ટીમમાં સ્ટાર ઓપનર ટ્રેવિસ હેડના સ્થાને નિખિલ ચૌધરીનો સમાવેશ કરવામાં આવ્યો છે. ટ્રેવિસ હેડ વ્યક્તિગત કારણોસર આ પ્રવાસ માટે ઉપલબ્ધ ન હોવાથી પસંદગીકારોએ નિખિલ પર ભરોસો મૂક્યો છે.
૩૦ વર્ષીય લેગ-સ્પિનિંગ ઓલરાઉન્ડર નિખિલ ચૌધરી અત્યાર સુધી ઓસ્ટ્રેલિયાના સ્ટેન્ડબાય ખેલાડીઓના ગ્રૂપનો હિસ્સો હતો અને ટીમ રવાના થાય તે પહેલાં તેણે બ્રિસ્બેનમાં મુખ્ય ટીમ સાથે સખત તાલીમ પણ લીધી હતી. હવે તે ૧૭ જૂને ચટ્ટોગ્રામમાં શરૂ થનારી શ્રેણી પૂર્વે ઢાકા ખાતે ઓસ્ટ્રેલિયન ટીમ સાથે જોડાવવા માટે સંપૂર્ણપણે તૈયાર છે. જો બાંગ્લાદેશ પ્રવાસ દરમિયાન નિખિલને ડેબ્યૂ કરવાની તક મળશે, તો તે છેલ્લા ૬૦ વર્ષથી વધુ સમયના ઇતિહાસમાં ઓસ્ટ્રેલિયાનું પ્રતિનિધિત્વ કરનાર પ્રથમ ભારતમાં જન્મેલા પુરુષ ક્રિકેટર બનીને નવો ઈતિહાસ રચશે.
કોરોનાકાળમાં બદલાઈ કિસ્મત: ઓસ્ટ્રેલિયામાં જઈને વસ્યા
નિખિલ ચૌધરીની ક્રિકેટ સફર કોઈ ફિલ્મી વાર્તાથી કમ નથી. તે વર્ષ ૨૦૧૭ થી ૨૦૧૯ વચ્ચે ભારતમાં પંજાબની ઘરેલું ટીમ તરફથી ક્રિકેટ રમતો હતો. જોકે, વર્ષ ૨૦૨૦ માં તે ઓસ્ટ્રેલિયાના પ્રવાસે ગયો અને બરાબર તે જ સમયે કોવિડ-૧૯ મહામારીના કારણે આંતરરાષ્ટ્રીય સરહદો સીલ થઈ ગઈ. આ કપરા સમયમાં તેણે ઓસ્ટ્રેલિયામાં જ સ્થાયી થવાનો નિર્ણય કર્યો અને ત્યાંના સ્થાનિક ક્રિકેટ (ગ્રેડ ક્રિકેટ) માં શૂન્યમાંથી પોતાની નવી સફર શરૂ કરી. જોકે નિખિલ પાસે હજુ સુધી ઓસ્ટ્રેલિયાની નાગરિકતા નથી, પરંતુ ત્યાં રહેઠાણનો ૫ વર્ષનો સમયગાળો પૂર્ણ કરી ચૂક્યો હોવાથી આઈસીસી (ICC) ના નિયમો હેઠળ તે ઓસ્ટ્રેલિયા તરફથી રમવા માટે સંપૂર્ણ લાયક ઠર્યો છે.
બિગ બેશ લીગ (BBL) અને આઈપીએલમાં પણ જલવો
નિખિલ ચૌધરીએ વર્ષ ૨૦wr-૨૫ ની બિગ બેશ લીગ (BBL) માં હોબાર્ટ હરિકેન્સને ચેમ્પિયન બનાવવામાં ઓલરાઉન્ડ પ્રદર્શન કરીને મુખ્ય ભૂમિકા ભજવી હતી. ત્યાર બાદ તાસ્માનિયા રાજ્ય તરફથી રમતા તેણે શેફિલ્ડ શીલ્ડ ટ્રોફીમાં પોતાની પ્રથમ ફર્સ્ટ-ક્લાસ સદી ફટકારી હતી અને એક જ ઇનિંગ્સમાં ૫ વિકેટ લેવાનો પરાક્રમ પણ કર્યો હતો. તેના આ શાનદાર ફોર્મને કારણે તે પ્રખ્યાત ઇન્ડિયન પ્રીમિયર લીગ (IPL) માં દિલ્હી કેપિટલ્સની ટીમનો પણ હિસ્સો બન્યો હતો.
ઓસ્ટ્રેલિયાના મુખ્ય પસંદગીકાર ટોની ડોડેમાઇડે નિખિલના વખાણ કરતા જણાવ્યું હતું કે, "નિખિલ છેલ્લા કેટલાક સમયથી અમારા રડાર પર હતો. તેના ખાસ કરીને બીબીએલ (BBL) ના ફોર્મથી સિલેક્શન પેનલ ભારે પ્રભાવિત થઈ છે. બાંગ્લાદેશની સ્પિન-ફ્રેન્ડલી પીચો પર નિખિલનો અનુભવ ટીમ માટે અમૂલ્ય સાબિત થશે અને તે આગામી અઠવાડિયે રમાનારી પ્રથમ મેચની પ્લેઇંગ ઇલેવનમાં સ્થાન મેળવવા માટે પ્રબળ દાવેદાર છે."_