તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
આઈસીસી મેન્સ વનડે ટીમ રેન્કિંગના વાર્ષિક અપડેટમાં ભારતનો દબદબો યથાવત : નંબર વનનો તાજ જાળવી રાખ્યો
બીજા ક્રમે રહેલા ન્યુઝીલેન્ડ અને ભારત વચ્ચે હવે માત્ર પાંચ પોઈન્ટનું અંતર, ઓસ્ટ્રેલિયા ત્રીજા ક્રમે
દુબઇ : આંતરરાષ્ટ્રીય ક્રિકેટ કાઉન્સિલ (આઈસીસી) દ્વારા બહાર પાડવામાં આવેલા મેન્સ વનડે ટીમ રેન્કિંગના તાજા વાર્ષિક અપડેટમાં ભારતીય ક્રિકેટ ટીમે પોતાનું નંબર વનનું સ્થાન જાળવી રાખીને વિશ્વ ક્રિકેટમાં પોતાનું વર્ચસ્વ કાયમ રાખ્યું છે. જોકે, ટોચના સ્થાને બિરાજમાન ભારત અને બીજા ક્રમાંકિત ન્યુઝીલેન્ડ વચ્ચેનું રેટિંગ પોઈન્ટનું અંતર જે અગાઉ આઠ પોઈન્ટનું હતું, તે ઘટીને હવે માત્ર પાંચ પોઈન્ટનું થઈ ગયું છે. ટોપ-૧૦માં સાઉથ આફ્રિકાએ પાકિસ્તાનને પછાડીને ચોથું સ્થાન મેળવી લીધું છે.
આઈસીસી દ્વારા તાજેતરમાં મેન્સ વનડે ટીમ રેન્કિંગનું વાર્ષિક અપડેટ જાહેર કરવામાં આવ્યું છે. આ અદ્યતન આંકડાઓ મુજબ, ભારતીય ક્રિકેટ ટીમે વનડે ફોર્મેટમાં વિશ્વની સર્વશ્રેષ્ઠ ટીમ તરીકેનો પોતાનો તાજ સફળતાપૂર્વક જાળવી રાખ્યો છે.
આ નવા અપડેટમાં ભારતના રેટિંગમાં એક પોઈન્ટનો સામાન્ય ઘટાડો નોંધાયો છે, જેનાથી ભારત ૧૧૯ પોઈન્ટથી ઘટીને ૧૧૮ પોઈન્ટ પર આવી ગયું છે. બીજી તરફ ન્યુઝીલેન્ડની ટીમે શાનદાર પ્રદર્શનના આધારે બે પોઈન્ટનો સીધો ફાયદો મેળવીને ૧૧૩ પોઈન્ટ સાથે પોતાનું બીજું સ્થાન વધુ મજબૂત કર્યું છે. આ પરિસ્થિતિના કારણે, નંબર વન અને નંબર ટુ ટીમ વચ્ચેનું અંતર હવે માત્ર પાંચ પોઈન્ટનું જ રહી ગયું છે. જ્યારે વર્તમાન વનડે વર્લ્ડ કપ ચેમ્પિયન ઓસ્ટ્રેલિયા ૧૦૯ પોઈન્ટ સાથે અગાઉની જેમ જ ત્રીજા સ્થાને અકબંધ છે.
આ વાર્ષિક અપડેટમાં ટોપ-૧૦ રેન્કિંગની અંદર માત્ર એક જ મોટો અને નોંધપાત્ર ફેરફાર જોવા મળ્યો છે. સાઉથ આફ્રિકાની ટીમ ચાર પોઈન્ટના જંગી ઉછાળા સાથે ૧૦૨ પોઈન્ટ મેળવીને પાકિસ્તાનને ઓવરટેક કરી ચોથા ક્રમે પહોંચી ગઈ છે. જ્યારે પાકિસ્તાનની ટીમ ૯૮ પોઈન્ટ સાથે પાંચમા સ્થાને ધકેલાઈ ગઈ છે. આ સિવાયના ક્રમાંકોમાં છઠ્ઠા ક્રમે શ્રીલંકા (૯૬ પોઈન્ટ), સાતમા ક્રમે અફઘાનિસ્તાન (૯૩ પોઈન્ટ) અને આઠમા ક્રમે ઇંગ્લેન્ડ (૮૯ પોઈન્ટ) યથાવત છે. બાંગ્લાદેશ ૮૪ પોઈન્ટ સાથે નવમા ક્રમે છે અને ૧૦મા ક્રમે રહેલી વેસ્ટ ઈન્ડિઝ (૭૪ પોઈન્ટ) વચ્ચેનું પોઈન્ટનું અંતર અગાઉ છ હતું તે હવે વધીને ૧૦ પોઈન્ટનું થઈ ગયું છે. આઈસીસીના જણાવ્યા મુજબ, વર્ષ ૨૦૨૭ ના મેન્સ ક્રિકેટ વર્લ્ડ કપના ડાયરેક્ટ ક્વોલિફિકેશન માટે આ રેન્કિંગ અત્યંત મહત્વનું સાબિત થશે.
(3:24 PM IST)
છેલ્લા 8 દિવસમાં સૌથી લોકપ્રિય 
