ન્યૂયોર્ક:ફિફા વર્લ્ડ કપ ૨૦૨૬ના આયોજન પૂર્વે ફૂટબોલ ચાહકો માટે ટિકિટના દરોમાં થયેલો વધારો ચર્ચાનો વિષય બન્યો છે. ફિફા દ્વારા જાહેર કરવામાં આવેલી નવીનતમ વેચાણ તબક્કાની વિગતો અનુસાર, ૧૯ જુલાઈના રોજ ન્યૂ જર્સીના મેટલાઈફ સ્ટેડિયમમાં રમાનારી ફાઈનલ મેચની ટોપ કેટેગરીની ટિકિટની કિંમત હવે ૧૦,૯૯૦ ડોલર (આશરે ૯.૧૫ લાખ રૂપિયાથી વધુ) પર પહોંચી ગઈ છે. અગાઉ ડિસેમ્બરમાં આ જ ટિકિટનો ભાવ ૮,૬૮૦ ડોલર હતો.
વિવિધ કેટેગરીમાં ભાવ વધારો અને ટેકનિકલ ખામી
ફાઈનલ મેચની કેટેગરી-૨ ની ટિકિટ જે અગાઉ ૫,૫૭૫ ડોલર હતી, તેનો ભાવ વધીને ૭,૩૮૦ ડોલર થયો છે, જ્યારે કેટેગરી-૩ ની ટિકિટ ૪,૧૮૫ ડોલરથી વધીને ૫,૭૮૫ ડોલર કરવામાં આવી છે. ટિકિટ વેચાણનો નવો તબક્કો શરૂ થતા જ ચાહકોને અનેક ટેકનિકલ સમસ્યાઓનો સામનો કરવો પડ્યો હતો. ઘણા યુઝર્સે લાંબા વેટિંગ ટાઈમ અને ખોટી લિંક્સ રિડાયરેક્ટ થવાની ફરિયાદો કરી હતી. જોકે, ફિફાએ પાછળથી જણાવ્યું હતું કે આ સમસ્યાઓનું નિરાકરણ લાવી દેવામાં આવ્યું છે.
અમેરિકી સાંસદો દ્વારા આકરી ટીકા
ફિફાની ‘ડાયનેમિક પ્રાઈસિંગ’ (માંગ મુજબ ભાવ વધારો) વ્યૂહરચનાની અમેરિકામાં ભારે ટીકા થઈ રહી છે. અમેરિકી કોંગ્રેસના ૬૯ ડેમોક્રેટિક સભ્યોએ એક પત્ર લખીને જણાવ્યું છે કે, આ પ્રકારની મોંઘી ટિકિટ પ્રણાલી ફિફાના સર્વસમાવેશક ફૂટબોલના મિશનથી વિપરીત છે. આ નીતિ ૨૦૨૬ના વર્લ્ડ કપને ઈતિહાસનો સૌથી ખર્ચાળ અને સામાન્ય માણસ માટે અગમ્ય બનાવી દેશે. ફિફા પોતાની રિસેલ પ્લેટફોર્મ પર પણ ખરીદનાર અને વેચનાર બંને પાસેથી ૧૫% ફી વસૂલે છે, જેની સામે યુરોપિયન કમિશનમાં પણ ફરિયાદ થઈ છે.
ઉદઘાટન મેચોના ભાવમાં પણ ફેરફાર
વર્લ્ડ કપના ગ્રુપ સ્ટેજની મેચોના ભાવમાં પણ વધારો જોવા મળ્યો છે. ૧૧ જૂનના રોજ મેક્સિકો અને દક્ષિણ આફ્રિકા વચ્ચેની ઉદઘાટન મેચની ટિકિટ ૨,૩૫૫ ડોલરથી વધીને ૨,૯૮૫ ડોલર થઈ છે. અમેરિકાની ૧૨ જૂનના રોજ પેરાગ્વે સામેની મેચની ટોપ ટાયર ટિકિટ ૨,૭૩૫ ડોલર પર સ્થિર છે. નોંધનીય છે કે આ વખતે ટુર્નામેન્ટ અમેરિકા, મેક્સિકો અને કેનેડાના ૧૬ શહેરોમાં યોજાવાની છે.
ભારે માંગ વચ્ચે ૪૮ ટીમોનું લાઇનઅપ પૂર્ણ
ફિફા પ્રમુખ જિયાની ઇન્ફેન્ટિનોએ આ પ્રાઇસિંગ સ્ટ્રેટેજીનો બચાવ કરતા કહ્યું હતું કે ટિકિટોની માંગ અભૂતપૂર્વ છે. તાજેતરમાં જ ક્વોલિફાઇંગ રાઉન્ડ પૂર્ણ થતા બોસ્નિયા-હર્ઝેગોવિના, કોંગો, ચેક રિપબ્લિક, ઇરાક, સ્વીડન અને તુર્કીએ અંતિમ સ્થાનો સુરક્ષિત કર્યા છે. અત્યાર સુધીમાં વેચાણના પાંચ રાઉન્ડ પૂર્ણ થયા છે અને ચાહકો પ્રથમ વખત ચોક્કસ સીટની પસંદગી કરી શકશે. જોકે, કિંમતોમાં સતત વધારો રમતપ્રેમીઓના ખિસ્સા પર મોટો બોજ નાખી રહ્યો છે.