બેંગલુરુ:આઈપીએલ 2026 ની પહેલી જ મેચમાં ક્રિકેટ પ્રેમીઓને હાઈ-વોલ્ટેજ ડ્રામા જોવા મળ્યો, જ્યાં રોયલ ચેલેન્જર્સ બેંગ્લોરે સનરાઇઝર્સ હૈદરાબાદ સામે ઐતિહાસિક વિજય નોંધાવ્યો છે. ચિન્નાસ્વામી સ્ટેડિયમમાં રમાયેલી આ મેચમાં બંને ટીમોના બેટ્સમેનોએ બોલરોની એવી ધુલાઈ કરી કે આખી મેચમાં 400 થી વધુ રનનો ખડકલો થઈ ગયો હતો. હૈદરાબાદે આપેલા 202 રનના પડકારને આરસીબીએ અત્યંત આક્રમક રીતે માત્ર 15.4 ઓવરમાં પાર પાડીને નવો કીર્તિમાન સ્થાપિત કર્યો છે. વિરાટ કોહલીએ 38 બોલમાં અણનમ 69 રનની કેપ્ટન ઇનિંગ રમીને સ્ટેડિયમને ગજવી મૂક્યું હતું, પરંતુ આ જીતનો અસલી ટર્નિંગ પોઈન્ટ ઇમ્પેક્ટ પ્લેયર તરીકે આવેલો બેટ્સમેન સાબિત થયો હતો.

મેચની શરૂઆતમાં જ્યારે આરસીબીએ પોતાની પ્લેઈંગ ઈલેવન જાહેર કરી ત્યારે તેમાં દેવદત્ત પડિકલનું નામ નહોતું, પરંતુ રન ચેઝ દરમિયાન તેને જેકબ ડફીના સ્થાને મેદાનમાં ઉતારવામાં આવ્યો હતો. પડિકલે આ તકને બન્ને હાથે ઝડપી લીધી અને હૈદરાબાદના બોલરો પર કાળ બનીને તૂટી પડ્યો હતો. તેણે માત્ર 26 બોલમાં 234 થી વધુના સ્ટ્રાઈક રેટ સાથે 61 રનની વાવાઝોડા જેવી ઇનિંગ રમી, જેમાં સાત ચોગ્ગા અને ચાર ગગનચુંબી છગ્ગાનો સમાવેશ થાય છે. પડિકલની આ આક્રમક બેટિંગને કારણે વિરાટ કોહલી પરથી દબાણ ઓછું થયું અને આરસીબીએ અશક્ય લાગતો લક્ષ્યાંક ખૂબ જ સરળતાથી હાંસલ કરી લીધો હતો.

બીજી તરફ, ન્યુઝીલેન્ડના સ્પીડ સ્ટાર જેકબ ડફીએ બોલિંગમાં પોતાની ધારદાર શક્તિનું પ્રદર્શન કર્યું હતું. ભલે તે ઇમ્પેક્ટ પ્લેયરના નિયમને કારણે મેચમાંથી બહાર થયો, પરંતુ તે પહેલા તેણે હૈદરાબાદના ટોપ ઓર્ડરના છોતરાં કાઢી નાખ્યા હતા. ડફીએ 4 ઓવરમાં માત્ર 22 રન આપીને અભિષેક શર્મા અને ટ્રેવિસ હેડ જેવા ખતરનાક બેટ્સમેનો સહિત કુલ ત્રણ વિકેટ ઝડપી હતી. બેટ્સમેનોના દબદબા વાળી આ મેચમાં તેની આર્થિક અને વિકેટ ટેકિંગ બોલિંગ બદલ તેને 'પ્લેયર ઓફ ધ મેચ' જાહેર કરવામાં આવ્યો હતો. આ જીત સાથે આરસીબીએ ટૂર્નામેન્ટમાં શાનદાર આગાઝ કર્યો છે અને વિરોધી ટીમો માટે ખતરાની ઘંટડી વગાડી દીધી છે.