બેંગ્લુરુ: તા.૨૮: આઈપીએલ 2026નો શંખનાદ આજે બેંગ્લુરુના એમ. ચિન્નાસ્વામી સ્ટેડિયમમાં ડિફેન્ડિંગ ચેમ્પિયન રોયલ ચેલેન્જર્સ બેંગ્લુરુ (RCB) અને સનરાઈઝર્સ હૈદરાબાદ (SRH) વચ્ચેની ટક્કર સાથે થઈ રહ્યો છે. જોકે, આજની મેચ રમતની સાથે સાથે લાગણીઓથી પણ ભરેલી હશે. આરસીબીના ખેલાડીઓ આજે મેદાનમાં પોતાના હાથ પર કાળી પટ્ટી (બ્લેક આર્મ બેન્ડ) બાંધીને ઉતરશે, જેની પાછળ એક અત્યંત કરુણ કારણ રહેલું છે.
હકીકતમાં, ગત વર્ષે જ્યારે આરસીબી ખિતાબ જીતી ત્યારે વિજય ઉત્સવ દરમિયાન સ્ટેડિયમની બહાર થયેલી નાસભાગમાં 11 ચાહકોએ પોતાના જીવ ગુમાવ્યા હતા. પોતાના આ વફાદાર ફેન્સને યાદ કરવા અને તેમને ટ્રીબ્યૂટ આપવા માટે ફ્રેન્ચાઈઝીએ આ ખાસ નિર્ણય લીધો છે. આરસીબી પરિવારે સત્તાવાર રીતે જણાવ્યું છે કે, "તે 11 ફેન્સ હંમેશા અમારા પરિવારનો ભાગ રહેશે."
 
કેવી રીતે અપાશે શ્રદ્ધાંજલિ?
•    કાળી પટ્ટી: મેચ દરમિયાન તમામ ખેલાડીઓ હાથ પર કાળી પટ્ટી બાંધીને રમત રમશે.
•    11 નંબરની જર્સી: વોર્મ-અપ અને પ્રેક્ટિસ દરમિયાન ખેલાડીઓ 11 નંબરની સ્પેશિયલ જર્સી પહેરેલા જોવા મળશે.
•    ખાલી બેઠકો: સ્ટેડિયમમાં 11 બેઠકો આ ફેન્સની સ્મૃતિમાં કાયમ માટે ખાલી રાખવામાં આવશે, જે તેમની હાજરીનું પ્રતીક બની રહેશે.
 
આરસીબીની ટીમમાં આ વખતે વિરાટ કોહલી સાથે રજત પાટીદાર કેપ્ટન તરીકે જવાબદારી સંભાળી રહ્યો છે. ટીમમાં ફિલ સોલ્ટ, કૃણાલ પંડ્યા અને ભુવનેશ્વર કુમાર જેવા દિગ્ગજો પણ સામેલ છે. મેદાન પર આજે હાઈ-વોલ્ટેજ ડ્રામા જોવા મળશે, પરંતુ મેચની શરૂઆત પહેલા સ્ટેડિયમમાં મૌન પાળીને આ દિવંગત ફેન્સને યાદ કરવામાં આવશે.
ક્રિકેટ માત્ર રમત નથી પણ એક લાગણી છે, તે વાત આજે આરસીબીએ ફરી એકવાર સાબિત કરી દીધી છે. ફેન્સના આ બલિદાન અને તેમના અતૂટ સાથને સન્માન આપીને ટીમે કરોડો લોકોના દિલ જીતી લીધા છે.