ઓકલેન્ડ: અમેરિકામાં રમાતી હાઈ-પ્રોફાઈલ ટી૨૦ લીગ 'મેજર લીગ ક્રિકેટ' (MLC) ની ચોથી સીઝન માટેના શિડ્યુલની જાહેરાત થઈ ગઈ છે. આ વખતે ક્રિકેટપ્રેમીઓ માટે સૌથી મોટા સમાચાર એ છે કે લીગની નિર્ણાયક પ્લેઓફ મેચો અને ગ્રાન્ડ ફાઈનલ પ્રથમવાર અમેરિકાના પશ્ચિમ કિનારે (West Coast) એટલે કે ઓકલેન્ડમાં યોજાશે. ૧૫ જુલાઈથી ઓકલેન્ડ કોલિસિયમ ખાતે પ્લેઓફનો પ્રારંભ થશે, જ્યારે ૧૮ જુલાઈએ નવી ચેમ્પિયન ટીમનો ફેંસલો આવશે.
ટેક્સાસથી શરૂ થઈ કેલિફોર્નિયામાં પૂર્ણાહુતિ
આ સીઝનનો પ્રારંભ ૧૮ જૂનથી ટેક્સાસના ગ્રાન્ડ પ્રેઇરી સ્ટેડિયમ ખાતે થશે. ત્યારબાદ કારવાં કેલિફોર્નિયા તરફ આગળ વધશે. ઓકલેન્ડ કોલિસિયમ, જે ગયા વર્ષે હાઈ-સ્કોરિંગ ગ્રાઉન્ડ તરીકે ઉભરી આવ્યું હતું, ત્યાં ૨૪ થી ૨૮ જૂન દરમિયાન નિયમિત સીઝનની ૮ મહત્વની મેચો રમાશે જેમાં તમામ ૬ ટીમો પોતાનું જોર બતાવશે.
નાઈટ રાઈડર્સ માટે ઘરઆંગણે રમવાની તક
આ સીઝનનો બીજો મોટો વળાંક લોસ એન્જલસ નાઈટ રાઈડર્સ (LAKR) માટે છે. ટીમને હવે પોમોનામાં 'નાઈટ રાઈડર્સ ક્રિકેટ ફિલ્ડ' ના નામે પોતાનું કાયમી હોમ ગ્રાઉન્ડ મળી ગયું છે. અહીં ૧ થી ૫ જુલાઈ દરમિયાન મેચો રમાશે, જે નાઈટ રાઈડર્સના ચાહકો માટે દિવાળી જેવો માહોલ સર્જશે. એમએલસીના સીઈઓ જોની ગ્રેવે આ અંગે ઉત્સાહ વ્યક્ત કરતા કહ્યું કે, "ગયા વર્ષે બે એરિયામાં ક્રિકેટ પ્રત્યે જે જૂનુન જોવા મળ્યું હતું, તેને જોતા અમે આ વખતે ફાઈનલ અહીં લાવવા માટે ખૂબ જ રોમાંચિત છીએ."
ચાહકોનો વધતો ક્રેઝ અને અવિસ્મરણીય વાતાવરણ
મેજર લીગ ક્રિકેટની લોકપ્રિયતા અમેરિકામાં જે ઝડપે વધી રહી છે તે અદભૂત છે. અત્યાર સુધીની તમામ ફાઈનલ મેચો હાઉસફુલ રહી છે. જોની ગ્રેવના મતે, ઓકલેન્ડ કોલિસિયમની નવી જગ્યામાં પ્લેઓફની એ જ તીવ્રતા અને ઉર્જા જોવા મળશે જે અગાઉ ટેક્સાસમાં જોવા મળી હતી. દુનિયાભરના સ્ટાર ખેલાડીઓ જ્યારે વેસ્ટ કોસ્ટ પર ટકરાશે, ત્યારે અમેરિકન ધરતી પર ક્રિકેટનો એક નવો ઇતિહાસ લખાશે.