ચેન્નાઈ:ઇન્ડિયન પ્રીમિયર લીગ (IPL) ૨૦૨૬ની સીઝન શરૂ થાય તે પહેલાં ચેન્નાઈ સુપર કિંગ્સ (CSK) એ એક ચોંકાવનારી પણ સ્પષ્ટ જાહેરાત કરી દીધી છે. રાજસ્થાન રોયલ્સના પૂર્વ કેપ્ટન સંજુ સેમસનની CSKમાં એન્ટ્રી બાદ એવી જોરદાર ચર્ચા હતી કે ટીમની કમાન સેમસનને સોંપવામાં આવશે. જોકે, ગુરુવારે મેનેજમેન્ટે આ તમામ અટકળો પર પૂર્ણવિરામ મૂકતા સ્પષ્ટ કર્યું છે કે રુતુરાજ ગાયકવાડ જ આ સીઝનમાં ટીમનું નેતૃત્વ કરશે. આનો અર્થ એ થયો કે માહી (એમએસ ધોની) અને સંજુ સેમસન જેવા દિગ્ગજ વિકેટકીપર-બેટ્સમેનો રુતુરાજના માર્ગદર્શન હેઠળ મેદાનમાં ઉતરશે.
ગયા વર્ષે રુતુરાજની કેપ્ટનશીપમાં CSKનું પ્રદર્શન અત્યંત નિરાશાજનક રહ્યું હતું. ટીમ ૧૪ માંથી માત્ર ૪ મેચ જીતી શકી હતી અને પોઈન્ટ ટેબલમાં ૧૦મા સ્થાને રહીને પ્લેઓફની રેસમાંથી બહાર થઈ ગઈ હતી. આમ છતાં, ફ્રેન્ચાઇઝીએ તેની આંતરરાષ્ટ્રીય ક્ષમતા પર ભરોસો મૂક્યો છે. રુતુરાજે ૨૦૨૨ એશિયન ગેમ્સમાં ટીમ ઇન્ડિયાને ગોલ્ડ મેડલ અપાવ્યો હતો, જે તેની કેપ્ટનશીપની ક્ષમતાનો મોટો પુરાવો છે.
 IPL ૨૦૨૬ ના જાહેર થયેલા પ્રારંભિક શેડ્યૂલ મુજબ, ચેન્નાઈ સુપર કિંગ્સ તેની પ્રથમ મેચ ૩૦ માર્ચે ગુવાહાટીના બારસાપારા ક્રિકેટ સ્ટેડિયમમાં રાજસ્થાન રોયલ્સ સામે રમશે. આ મેચ ખાસ કરીને સંજુ સેમસન માટે ભાવુક હશે કારણ કે તે પોતાની જૂની ટીમ સામે ટકરાશે. ત્યારબાદ ૩ એપ્રિલે ચેન્નાઈ પોતાના હોમ ગ્રાઉન્ડ 'ચેપોક' પર પંજાબ કિંગ્સનો સામનો કરશે.
CSK ની આગામી મહત્વની મેચો:
૩૦ માર્ચ: વિરુદ્ધ રાજસ્થાન રોયલ્સ (ગુવાહાટી)
૩ એપ્રિલ: વિરુદ્ધ પંજાબ કિંગ્સ (ચેન્નાઈ)
૫ એપ્રિલ: વિરુદ્ધ રોયલ ચેલેન્જર્સ બેંગ્લોર (બેંગ્લોર)
૧૧ એપ્રિલ: વિરુદ્ધ મુંબઈ ઇન્ડિયન્સ (ચેન્નાઈ)
શું રુતુરાજ ગાયકવાડ આ વખતે ધોની અને સેમસનના અનુભવનો ઉપયોગ કરીને CSKને ફરીથી ચેમ્પિયન બનાવી શકશે? તે જોવું રસપ્રદ રહેશે