હૈદરાબાદ: ઇન્ડિયન પ્રીમિયર લીગ (IPL) ૨૦૨૬ની સીઝન શરૂ થાય તે પહેલા જ સનરાઇઝર્સ હૈદરાબાદ (SRH) છાવણીમાંથી સૌથી મોટા સમાચાર સામે આવ્યા છે. ટીમના નિયમિત કેપ્ટન અને ઓસ્ટ્રેલિયન સ્ટાર પેટ કમિન્સ કમરની ઈજાના કારણે ટુર્નામેન્ટની શરૂઆતની કેટલીક મેચો ગુમાવશે. આ સ્થિતિમાં ફ્રેન્ચાઇઝીએ ભારતના સ્ટાર વિકેટકીપર-બેટ્સમેન ઇશાન કિશનને ટીમના કાર્યકારી કેપ્ટન તરીકે નિયુક્ત કરીને તમામને ચોંકાવી દીધા છે. હૈદરાબાદે બુધવારે સોશિયલ મીડિયા દ્વારા આ સત્તાવાર જાહેરાત કરી છે.
    ઇશાન કિશન માટે આ વર્ષ કોઈ ચમત્કારથી ઓછું નથી. ૨૦૨૨માં ટીમ ઇન્ડિયામાંથી બહાર થયા બાદ અને સેન્ટ્રલ કોન્ટ્રાક્ટ ગુમાવ્યા પછી, કિશને શાનદાર વાપસી કરી છે. તેણે ૨૦૨૫માં ઝારખંડને પોતાની કેપ્ટનશીપ હેઠળ પ્રથમવાર સૈયદ મુશ્તાક અલી ટ્રોફીનું ટાઇટલ અપાવ્યું હતું, જેમાં તેણે ૧૦ મેચમાં ૫૧૭ રન ફટકાર્યા હતા. તાજેતરમાં સંપન્ન થયેલા ૨૦૨૬ના T20 વર્લ્ડ કપમાં પણ કિશને ૧૯૩ના સ્ટ્રાઇક રેટથી ૩૧૭ રન બનાવીને ભારતની જીતમાં મહત્વની ભૂમિકા ભજવી હતી. તેના આ જ નેતૃત્વ ગુણો અને ફોર્મને જોઈને હૈદરાબાદે તેના પર ભરોસો મૂક્યો છે.
    ટીમમાં અન્ય એક મોટો ફેરફાર એ છે કે, આક્રમક ઓપનર અભિષેક શર્માને વાઇસ-કેપ્ટન બનાવવામાં આવ્યો છે. જોકે વર્લ્ડ કપમાં અભિષેકનું પ્રદર્શન મિશ્ર રહ્યું હતું, પરંતુ સ્થાનિક સ્તરે અને IPLમાં તેની ઉપયોગિતાને જોતા તેને આ મોટી જવાબદારી સોંપાઈ છે. સનરાઇઝર્સ હૈદરાબાદ પોતાની પ્રથમ મેચ ૨૮ માર્ચે બેંગલુરુના એમ ચિન્નાસ્વામી સ્ટેડિયમમાં ડિફેન્ડિંગ ચેમ્પિયન RCB સામે રમશે. આ મેચ હાઈ-વોલ્ટેજ રહેશે કારણ કે ઇશાન કિશન કેપ્ટન તરીકે પહેલીવાર ઓરેન્જ જર્સીમાં મેદાનમાં ઉતરશે.
   બીજી તરફ, પેટ કમિન્સની ઈજા ઓસ્ટ્રેલિયા અને હૈદરાબાદ બંને માટે ચિંતાનો વિષય છે. ૨૦૨૫-૨૬ની એશિઝ શ્રેણી દરમિયાન કમિન્સને પીઠમાં ગંભીર ઈજા થઈ હતી, જેના કારણે તે વર્લ્ડ કપ પણ રમી શક્યો ન હતો. હાલમાં તે રિહેબિલિટેશન હેઠળ છે અને ટુર્નામેન્ટના અંતિમ તબક્કામાં ટીમ સાથે જોડાય તેવી શક્યતા છે. હૈદરાબાદના ચાહકો હવે એ જોવા આતુર છે કે ઇશાન કિશન અને અભિષેક શર્માની આ યુવા જોડી ટીમને જીતના પથ પર કેવી રીતે લઈ જાય છે