રાજકોટ: ભારતીય ક્રિકેટ ટીમના T20 વર્લ્ડ કપ વિજેતા કેપ્ટન સૂર્યકુમાર યાદવ આજે વિશ્વ ક્રિકેટમાં એક મોટું નામ છે, પરંતુ આ સફળતા સુધી પહોંચવાનો રસ્તો જરાય આસાન નહોતો. તાજેતરમાં આપેલા એક ઇન્ટરવ્યુમાં સૂર્યાએ પોતાની સફળતાનો સંપૂર્ણ શ્રેય પત્ની દેવીશા શેટ્ટીને આપ્યો છે. સૂર્યકુમારે ભાવુક થતા કહ્યું કે, દેવીશા માત્ર તેની પત્ની નથી પણ તેની 'જીવન રક્ષક' છે, જેણે તેને અંધકારમાંથી બહાર કાઢીને સફળતાના શિખરે પહોંચાડ્યો છે.
2018નો એ ઐતિહાસિક સવાલ
વાત વર્ષ 2018ની છે, જ્યારે સૂર્યકુમાર આઈપીએલ અને ડોમેસ્ટિક ક્રિકેટમાં રમી રહ્યો હતો પણ ટીમ ઈન્ડિયામાં સ્થાન મળતું નહોતું. તે સમયે દેવીશાએ તેને એક સાદો પણ વેધક સવાલ પૂછ્યો હતો: "તમારી ઉંમરના બધા ખેલાડીઓ ભારત માટે રમી રહ્યા છે, તમારો શું પ્લાન છે? તમે કેવી રીતે ભારત માટે રમશો?" આ એક સવાલે સૂર્યાની ઊંઘ ઉડાવી દીધી અને તેણે પોતાની જીવનશૈલી બદલવાનો નિર્ણય કર્યો.
પાર્ટીઓ છોડી અને ડાયેટ પર આપ્યું ધ્યાન
સૂર્યાએ જણાવ્યું કે આ ચર્ચા બાદ તેમણે એક દંપતી તરીકે ઘણા ત્યાગ કર્યા. વીકેન્ડમાં મિત્રોને મળવાનું બંધ કર્યું, ખાવા-પીવા પર કડક નિયંત્રણો મૂક્યા અને આરામને બદલે માત્ર પ્રેક્ટિસ પર ધ્યાન કેન્દ્રિત કર્યું. પરિણામ એ આવ્યું કે 2018ની આઈપીએલમાં તેણે 512 રન ફટકાર્યા અને પછી 2021માં આખરે તેનું ભારતીય ટીમમાં રમવાનું સપનું પૂરું થયું.
"ઘરમાં હું સ્ટાર નથી, ફક્ત 'સૂર્ય' છું"
દેવીશા વિશે વાત કરતા કેપ્ટને કહ્યું કે, "તેણી મારા કામમાં દખલ નથી કરતી, પણ મને જીવનના મોટા પાઠ ભણાવે છે. તેણીએ મને શીખવ્યું છે કે ક્રિકેટને ઘરના દરવાજાની બહાર જ છોડી દેવું. ઘરમાં હું કોઈ સુપરસ્ટાર સૂર્યકુમાર યાદવ નથી, પણ માત્ર 'સૂર્ય' છું. આજે પણ જમ્યા પછી મારે મારી પ્લેટ જાતે જ ડીશવોશરમાં મૂકવી પડે છે. આ નાની નાની વસ્તુઓ મને જમીન સાથે જોડાયેલા રહેવામાં મદદ કરે છે."
સત્ય કહેનારી તાકાત
સૂર્યાના મતે, દેવીશા તેની સૌથી મોટી વિવેચક છે. તે હંમેશા મોઢા પર સત્ય કહે છે, જે પ્રગતિ માટે જરૂરી છે. આજે જ્યારે સૂર્યાના નેતૃત્વમાં ભારતે ફરી એકવાર T20 વર્લ્ડ કપ જીતીને ઇતિહાસ રચ્યો છે, ત્યારે તે પોતાની પત્નીના એ 'નિઃસ્વાર્થ' સમર્થનને યાદ કરીને ગદગદિત થઈ જાય છે.