પટના:  ટી20 વર્લ્ડ કપમાં ન્યુઝીલેન્ડ સામે ફાઈનલમાં 25 બોલમાં 54 રનની તોફાની ઇનિંગ રમી ભારતને ચેમ્પિયન બનાવનાર ઈશાન કિશન અત્યારે ગ્રાઉન્ડની બહાર પણ ચર્ચામાં છે. મંગળવારે જ્યારે તે પોતાના વતન પટના પહોંચ્યો ત્યારે ચાહકોએ તેનું ભવ્ય સ્વાગત કર્યું હતું. જોકે, આ ખુશીના માહોલ વચ્ચે મીડિયાએ તેને પૂર્વ ક્રિકેટર અને ટીએમસી સાંસદ કીર્તિ આઝાદના તે વિવાદાસ્પદ નિવેદન વિશે પૂછ્યું જેમાં તેમણે વર્લ્ડ કપ ટ્રોફીને હનુમાન મંદિરે લઈ જવાના નિર્ણયને 'શરમજનક' ગણાવ્યો હતો. આઝાદે સૂર્યકુમાર યાદવ અને જય શાહ પર નિશાન સાધતા કહ્યું હતું કે રમત આખા દેશની છે, તેને કોઈ ચોક્કસ ધર્મ સાથે ન જોડવી જોઈએ.

ઈશાન કિશને આ વિવાદમાં પડવાને બદલે ખૂબ જ પરિપક્વતા દાખવીને પત્રકારના સવાલનો વળતો જવાબ આપ્યો હતો. તેણે શાંતિથી કહ્યું, "હું અત્યારે વર્લ્ડ કપ જીતીને દેશ માટે આટલું મોટું સન્માન લાવ્યો છું, તો તમારે મને કોઈ સારા અને પોઝિટિવ પ્રશ્નો પૂછવા જોઈએ. કીર્તિ આઝાદે શું કહ્યું તેના પર મારે કોઈ ટિપ્પણી નથી કરવી. તમારે મને એ પૂછવું જોઈએ કે મને અત્યારે કેવું અનુભવાય છે અને આ જીતની મજા કેટલી છે." કિશનના આ ટૂંકા પણ સચોટ જવાબનો વીડિયો હવે સોશિયલ મીડિયા પર જોરદાર વાયરલ થઈ રહ્યો છે, જેમાં ચાહકો તેની સમજદારીના વખાણ કરી રહ્યા છે.

આ સમગ્ર વિવાદ ત્યારે વકર્યો જ્યારે કેપ્ટન સૂર્યકુમાર યાદવ, કોચ ગૌતમ ગંભીર અને બીસીસીઆઈ સચિવ જય શાહે અમદાવાદના હનુમાન મંદિરમાં વિજય બાદ ટ્રોફી સાથે પૂજા અર્ચના કરી હતી. સોશિયલ મીડિયા પર આ વીડિયો વાયરલ થતા જ કીર્તિ આઝાદે તેને ધાર્મિક રંગ આપવાનો પ્રયાસ કર્યો અને 1.4 અબજ ભારતીયોની ભાવનાઓનો હવાલો આપી ટીકા કરી હતી. જોકે, ઈશાન કિશને જે રીતે આ નકારાત્મકતાને બાજુ પર મૂકીને માત્ર રમત અને રાષ્ટ્રીય ગૌરવ પર ધ્યાન કેન્દ્રિત કર્યું, તેણે સાબિત કરી દીધું કે મેદાન પરની તેની આક્રમકતા અને મેદાનની બહારની તેની શાંતિ બંને ટીમ ઈન્ડિયા માટે અમૂલ્ય છે.