અમદાવા : અમદાવાદનું નરેન્દ્ર મોદી સ્ટેડિયમ આજે ફરી એકવાર ક્રિકેટના મહાસંગ્રામનું સાક્ષી બનવા જઈ રહ્યું છે. ભારત અને ન્યૂઝીલેન્ડ વચ્ચેની આ ફાઈનલ મેચમાં પિચની ભૂમિકા સૌથી મહત્વની સાબિત થશે. અગાઉની મેચોમાં વપરાયેલી કાળી માટીને બદલે, આ વખતે ફાઈનલ માટે ખાસ 'મિક્સ સોઈલ' (મિશ્ર માટી) થી પિચ તૈયાર કરવામાં આવી છે, જે બેટ્સમેનો માટે સ્વર્ગ સમાન છે. આ પિચ પર બોલનો ઉછાળો બેટ્સમેનોને મોટા શોટ રમવામાં મદદ કરશે. સ્ટેડિયમમાં રમાયેલી અગાઉની મેચમાં 200 થી વધુ રનનો સ્કોર બન્યો હતો, જે સ્પષ્ટ કરે છે કે આજે ક્રિકેટ પ્રેમીઓને હાઈ-સ્કોરિંગ અને રોમાંચક મુકાબલો જોવા મળી શકે છે.

ટીમ ઈન્ડિયા માટે આ ફાઈનલ માત્ર એક મેચ નથી, પરંતુ બદલા લેવાની મોટી તક છે. T20 વર્લ્ડ કપના ઇતિહાસમાં ન્યૂઝીલેન્ડ સામે ભારત ક્યારેય જીતી શક્યું નથી, જે આંકડા ભારતીય ફેન્સ માટે ચિંતાનો વિષય હોઈ શકે છે. જોકે, ટીમ ઈન્ડિયાનું વર્તમાન ફોર્મ અત્યંત આક્રમક છે અને ખેલાડીઓનો આત્મવિશ્વાસ સાતમા આસમાને છે. બીજી તરફ, ન્યૂઝીલેન્ડની ટીમ પ્રથમવાર વર્લ્ડ કપ જીતવા માટે મેદાનમાં ઉતરી રહી છે. ન્યૂઝીલેન્ડના કેપ્ટને સ્પષ્ટ સંકેત આપ્યા છે કે તેઓ ભારતીય ચાહકોના દિલ તોડીને ટ્રોફી જીતવા માટે તૈયાર છે, જેનાથી મેચમાં ભારે તણાવ અને રોમાંચની સ્થિતિ સર્જાઈ છે.

સાંજે 7:00 વાગ્યે શરૂ થનારા આ જંગ માટે સમગ્ર દેશની નજર અમદાવાદના મેદાન પર ટકેલી છે. એક તરફ ભારતનો ચોથી વખત ફાઈનલમાં પ્રવેશવાનો અનુભવ છે, તો બીજી તરફ કિવીઓની જીદ છે. જો પિચની વર્તણૂક અપેક્ષા મુજબ બેટ્સમેનોને સાથ આપે, તો દર્શકોને ચોગ્ગા અને છગ્ગાની રમઝટ જોવા મળશે. ટોસની ભૂમિકા પણ મહત્વની રહેશે, કારણ કે આ નવી પિચ પર પહેલા બેટિંગ કરીને મોટો સ્કોર ખડકવો એ વિજય માટેની સરળ વ્યૂહરચના બની શકે છે. હવે જોવાનું એ રહે છે કે સાંજનો સૂરજ કોના નામનો વિજયધ્વજ લહેરાવે છે, ભારતનો કે ન્યૂઝીલેન્ડનો.