મુંબઈ: ટી૨૦ વર્લ્ડ કપ ૨૦૨૬માં ટાઈટલ બચાવવા માટે રમી રહેલી ભારતીય ટીમ હવે ફાઈનલથી માત્ર એક ડગલું દૂર છે. મુંબઈના ઐતિહાસિક વાનખેડે સ્ટેડિયમ ખાતે ભારત અને ઇંગ્લેન્ડ વચ્ચે રમાનારી સેમીફાઈનલ મેચને લઈને ક્રિકેટ ચાહકોમાં ભારે ઉત્સાહ જોવા મળી રહ્યો છે. આ મેચ માટે ટિકિટ વિન્ડો ફરી એકવાર ખુલવા જઈ રહી છે.
બુક માય શો પર ટિકિટોનું વેચાણ
ટિકિટિંગ પાર્ટનર 'બુક માય શો' (Book My Show) દ્વારા આ મહત્વપૂર્ણ મેચ માટે વધારાની ટિકિટો બહાર પાડવાની જાહેરાત કરવામાં આવી છે. આજે એટલે કે બુધવાર, ૪ માર્ચના રોજ ભારતીય સમય મુજબ સાંજે ૬ વાગ્યાથી ટિકિટોનું વેચાણ પ્લેટફોર્મ પર લાઈવ થશે. વાનખેડેમાં ભારતની મેચ હોવાથી આ ટિકિટો ગણતરીની મિનિટોમાં વેચાઈ જવાની શક્યતા છે.
સતત ત્રીજીવાર ભારત-ઇંગ્લેન્ડ વચ્ચે સેમીફાઈનલનો જંગ
ક્રિકેટના ઇતિહાસમાં આ એક રસપ્રદ સંયોગ છે કે ભારત અને ઇંગ્લેન્ડ સતત ત્રીજા ટી૨૦ વર્લ્ડ કપમાં સેમીફાઈનલ તબક્કે આમને-સામને ટકરાશે. અગાઉ ૨૦૨૨ના વર્લ્ડ કપમાં ઇંગ્લેન્ડે ભારતને હરાવીને ટાઈટલ જીત્યું હતું, જ્યારે ૨૦૨૪માં ગયાના ખાતે ભારતે ઇંગ્લેન્ડને હરાવીને ગત હારનો બદલો લીધો હતો. હવે ૨૦૨૬માં ફરી એકવાર બંને ટીમો ફાઈનલની ટિકિટ મેળવવા મુંબઈના મેદાનમાં શક્તિપ્રદર્શન કરશે.
વાનખેડે સાથે ભારતનો અતૂટ નાતો
ભારતીય ટીમે આ ટુર્નામેન્ટની શરૂઆત પણ વાનખેડે સ્ટેડિયમથી જ કરી હતી, જ્યાં તેમની પ્રથમ મેચ અમેરિકા (USA) સામે રમાઈ હતી. હવે સેમીફાઈનલ જેવી નિર્ણાયક મેચ પણ આ જ મેદાન પર હોવાથી ભારતીય ખેલાડીઓને ઘરઆંગણે પ્રેક્ષકોના જબરદસ્ત સમર્થનનો લાભ મળશે. ભારત આ મેચ જીતીને વધુ એક વખત વર્લ્ડ કપની ફાઈનલમાં પ્રવેશવા માટે મક્કમ છે.