દુબઈ: ભારતીય મહિલા ક્રિકેટ ચાહકો માટે ગર્વ લેવા જેવા સમાચાર સામે આવ્યા છે. ICC દ્વારા જાહેર કરવામાં આવેલા તાજેતરના વનડે રેન્કિંગમાં ભારતની સ્ટાર ઓપનર સ્મૃતિ મંધાના વિશ્વની નંબર-1 વનડે બેટ્સમેન બની ગઈ છે. ઓસ્ટ્રેલિયા પ્રવાસ પર શાનદાર પ્રદર્શનના જોરે મંધાનાએ દક્ષિણ આફ્રિકાની લૌરા વોલ્વાર્ડટને પાછળ છોડીને આ પ્રતિષ્ઠિત સ્થાન હાંસલ કર્યું છે.
મંધાનાનું બેટ બોલ્યું અને રેન્કિંગ બદલાયું
સ્મૃતિ મંધાનાએ ઓસ્ટ્રેલિયા સામેની શ્રેણીમાં સાતત્યપૂર્ણ પ્રદર્શન કર્યું હતું. બ્રિસ્બેનમાં રમાયેલી પ્રથમ વનડેમાં તેણે આક્રમક 58 રન ફટકાર્યા હતા અને ત્યારબાદ હોબાર્ટમાં 31 રનની ઉપયોગી ઇનિંગ રમી હતી. આ રન તેને વિશ્વ રેન્કિંગમાં ટોચ પર લઈ જવા માટે પૂરતા સાબિત થયા હતા. મંધાના સિવાય ભારતીય કેપ્ટન હરમનપ્રીત કૌર માટે પણ આ રેન્કિંગ સારા સમાચાર લાવ્યું છે. હરમનપ્રીત ચાર સ્થાનની છલાંગ લગાવીને હવે 9મા ક્રમે પહોંચી ગઈ છે.
બોલિંગમાં અલાના કિંગનો 'કરિશ્મા'
બીજી તરફ, બોલિંગ રેન્કિંગમાં એક મોટો ફેરફાર જોવા મળ્યો છે. ઓસ્ટ્રેલિયાની સ્પિનર અલાના કિંગ હવે વિશ્વની નંબર-1 વનડે બોલર બની ગઈ છે. તેણે ઈંગ્લેન્ડની સોફી એક્લેસ્ટોનના સતત ચાર વર્ષના વર્ચસ્વનો અંત લાવ્યો છે. અલાનાએ ભારત સામેની ત્રીજી વનડેમાં માત્ર 33 રન આપીને 4 વિકેટ ઝડપી હતી, જેના કારણે તે 775 રેટિંગ પોઈન્ટ સાથે ટોચ પર પહોંચી ગઈ છે. ટોચના 8 બોલરોમાં 4 ઓસ્ટ્રેલિયન ખેલાડીઓનો દબદબો છે.
એલિસા હીલીની શાનદાર વિદાય
ઓસ્ટ્રેલિયાની દિગ્ગજ ખેલાડી એલિસા હીલીએ વનડે ક્રિકેટમાંથી નિવૃત્તિ જાહેર કરી છે. પોતાની અંતિમ મેચમાં સદી ફટકારીને તેણે રેન્કિંગમાં ચોથું સ્થાન મેળવ્યું છે. જ્યારે બેથ મૂની ત્રીજા અને એશ ગાર્ડનર પાંચમા ક્રમે છે. ઓલરાઉન્ડરની યાદીમાં પણ એશ ગાર્ડનર 516 પોઈન્ટ સાથે નંબર-1 પર અકબંધ છે.
ભારત માટે મિશ્ર લાગણી
જોકે ભારતીય ટીમ ઓસ્ટ્રેલિયા સામેની વનડે શ્રેણી હારી ગઈ હતી, પરંતુ વ્યક્તિગત રીતે ભારતીય ખેલાડીઓના પ્રદર્શનમાં સુધારો જોવા મળ્યો છે. સ્મૃતિ મંધાનાનું નંબર-1 બનવું એ આગામી મેચો માટે ટીમ ઈન્ડિયાના મનોબળમાં વધારો કરશે.