મુંબઈ: T20 વર્લ્ડ કપ 2026ની બીજી સેમિફાઇનલમાં ભારત અને ઈંગ્લેન્ડ વચ્ચે મુંબઈના વાનખેડે સ્ટેડિયમમાં જંગ જામવાનો છે. આ મહામુકાબલા પહેલા ક્રિકેટ જગતના દિગ્ગજ સુનીલ ગાવસ્કરે મોટી આગાહી કરી છે. ગાવસ્કરના મતે, આ મેચ વેસ્ટ ઈન્ડિઝ સામેની ક્વાર્ટર ફાઈનલ જેવી જ રોમાંચક હશે અને તેનો ફેંસલો છેલ્લી ઓવર (40મી ઓવર)માં જ આવશે.
બંને ટીમો 'સેમ ટુ સેમ': કાંટાની ટક્કર
ગાવસ્કરે જણાવ્યું હતું કે, "ભારત અને ઈંગ્લેન્ડ બંને ટીમો એકબીજાને બરાબરની ટક્કર આપે તેવી છે. બંને પાસે મજબૂત બેટિંગ લાઇન-અપ, ધારદાર બોલિંગ અને મેચ ફિનિશ કરી શકે તેવા ખેલાડીઓ છે. ઈંગ્લેન્ડના ઘણા ખેલાડીઓ IPL રમે છે, તેથી તેઓ ભારતીય પિચો અને અહીંના દબાણથી સારી રીતે વાકેફ છે. આ સંજોગોમાં મેચ અત્યંત રમુજી અને રસાકસીભરી બની રહેશે."
વાનખેડેનો ઈતિહાસ અને નવો યુગ
ભારતીય ટીમ ભલે 2011નો વર્લ્ડ કપ વાનખેડેમાં જીતી હોય, પરંતુ 1987 અને 2016માં આ જ મેદાન પર સેમિફાઇનલ હારી ચૂકી છે. આ અંગે ગાવસ્કરે સકારાત્મક વલણ અપનાવતા કહ્યું કે, "ગઈકાલે ઈડન ગાર્ડન્સમાં વેસ્ટ ઈન્ડિઝનો ક્યારેય ન હારવાનો રેકોર્ડ તૂટી ગયો, તેમ વાનખેડેમાં પણ નવો ઈતિહાસ લખાશે. આ એક નવી ટીમ છે અને તેમની પાસે આગળ વધવાની પૂરી ક્ષમતા છે."
અભિષેક શર્માને ગુરુમંત્ર: 'હંમેશા ચોથા ગિયરમાં ન રહો'
વર્લ્ડ કપમાં રન બનાવવા માટે સંઘર્ષ કરી રહેલા યુવા બેટ્સમેન અભિષેક શર્માને ગાવસ્કરે મહત્વની સલાહ આપી છે. તેમણે કહ્યું કે, "અભિષેકે હંમેશા 'ચોથા ગિયર'માં એટલે કે આક્રમક બેટિંગ કરવાની જરૂર નથી. પાવરપ્લેનો ફાયદો ઉઠાવવો જરૂરી છે, પણ પહેલા ક્રિઝ પર સેટ થાઓ અને પછી ધીમે-ધીમે ગિયર બદલો. પોતાની તાકાત મુજબ રમો, પણ ઉતાવળ ન કરો."
સ્પિન સામે ભારત નબળું?
ભારતીય બેટ્સમેનો સ્પિન સામે આઉટ થઈ રહ્યા હોવાની ચર્ચા પર ગાવસ્કરે બચાવ કરતા કહ્યું કે, "આ કોઈ ખાસ નબળાઈ નથી. T20 ફોર્મેટમાં બેટ્સમેન સ્પિનરો સામે મોટા શોટ્સ ફટકારવાનો પ્રયાસ કરતા હોય છે. જ્યારે તમે પાવર (તાકાત)નો વધુ ઉપયોગ કરો છો ત્યારે ટાઇમિંગ ચૂકી જવાય છે અને બોલ હવામાં ઊંચો જાય છે. આ માત્ર મેચની પરિસ્થિતિનો ભાગ છે, કોઈ ટેકનિકલ ખામી નથી."
આગામી 6 માર્ચે મુંબઈમાં યોજાનારી 'DP વર્લ્ડ સેલિબ્રિટી ગોલ્ફ ઇવેન્ટ' પહેલા ગાવસ્કરે આ મંતવ્યો વ્યક્ત કર્યા હતા, જ્યાં અનેક ક્રિકેટરો CHAMPS ફાઉન્ડેશન માટે એકઠા થશે.