કોલકાતા: T20 વર્લ્ડ કપ 2026 હવે તેના અંતિમ અને સૌથી રોમાંચક તબક્કે પહોંચી ગયો છે. બુધવારે કોલકાતાના ઐતિહાસિક ઈડન ગાર્ડન્સ ખાતે દક્ષિણ આફ્રિકા અને ન્યુઝીલેન્ડ વચ્ચે પ્રથમ સેમિફાઇનલ રમાશે. એકતરફ દક્ષિણ આફ્રિકાની ટીમ અત્યાર સુધીના પ્રદર્શન અને આંકડાઓને જોતા 'હોટ ફેવરિટ' ગણાઈ રહી છે, તો બીજી તરફ ન્યુઝીલેન્ડ પાસે મોટા મંચ પર દિગ્ગજોને પછાડવાનો જૂનો ઈતિહાસ છે.
આમને-સામને આંકડા: કોનું પલ્લું ભારે?
ટૂંકા ફોર્મેટમાં દક્ષિણ આફ્રિકાનો હાથ ઉપર રહ્યો છે. બંને ટીમો વચ્ચે રમાયેલી મેચોમાં આફ્રિકા 12-7થી આગળ છે, જ્યારે T20 વર્લ્ડ કપના ઈતિહાસમાં ન્યુઝીલેન્ડ ક્યારેય આફ્રિકાને હરાવી શક્યું નથી (રેકોર્ડ 5-0). જોકે, ન્યુઝીલેન્ડ માટે જમા પાસું એ છે કે ICC ટૂર્નામેન્ટની મોટી સેમિફાઇનલ્સમાં (2015 ODI વર્લ્ડ કપ અને ગયા વર્ષની ચેમ્પિયન્સ ટ્રોફી) તેઓએ જ આફ્રિકાને હારનો સ્વાદ ચખાડ્યો છે.
પાવરપ્લેમાં 'ફાયરપાવર'ની લડાઈ
બંને ટીમોના ઓપનર્સ અત્યારે શાનદાર ફોર્મમાં છે. ન્યુઝીલેન્ડની ફિન એલન અને ટિમ સીફર્ટની જોડી પાવરપ્લેમાં 10.43ની રનરેટથી બેટિંગ કરી રહી છે. સામે પક્ષે એડન માર્કરામ 192ના સ્ટ્રાઈક રેટથી તબાહી મચાવી રહ્યો છે, જોકે ક્વિન્ટન ડી કોકનું ફોર્મ આફ્રિકા માટે ચિંતાનો વિષય છે. લોકી ફર્ગ્યુસન 150+ની ઝડપે બોલિંગ કરીને ડી કોકને મુશ્કેલીમાં મૂકી શકે છે.
ડેથ ઓવર્સમાં આફ્રિકાનું બ્રહ્માસ્ત્ર: લુંગી એનગીડી અને કોર્બિન બોશ
આ મેચનો અસલી ફેંસલો છેલ્લી 5 ઓવરોમાં થશે. આ ટૂર્નામેન્ટમાં દક્ષિણ આફ્રિકાના ફાસ્ટ બોલરો ડેથ ઓવર્સમાં સૌથી વધુ કરકસરયુક્ત સાબિત થયા છે. લુંગી એનગીડી (5.6 ઇકોનોમી) અને કોર્બિન બોશ (6.9 ઇકોનોમી) અત્યારે વિશ્વના શ્રેષ્ઠ ડેથ બોલરો સાબિત થયા છે, જેમના સ્લોઅર અને યોર્કર કિવી બેટ્સમેનોની લય તોડી શકે છે.
મિલરનો 'કિલર' અનુભવ
જ્યારે વાત ફિનિશિંગની આવે ત્યારે ડેવિડ મિલરનું નામ સૌથી ઉપર આવે છે. ઈડન ગાર્ડન્સ પર મિલરનો રેકોર્ડ શાનદાર છે (સરેરાશ 62.25). તેની પાસે મુશ્કેલ પરિસ્થિતિમાંથી મેચ જીતાડવાનો બહોળો અનુભવ છે, જે ન્યુઝીલેન્ડના બોલરો માટે મોટો પડકાર બની રહેશે.
બુધવારની રાત્રે ઈડન ગાર્ડન્સની પિચ પર ફાસ્ટ બોલરોને મદદ મળવાની શક્યતા છે, જે જોતા બંને ટીમો પોતાની 'પેસ બેટરી' પર નિર્ભર રહેશે. શું કિવીઝ ફરી એકવાર સેમિફાઇનલના ચોકર્સ ગણાતા આફ્રિકાને હરાવશે કે પછી પ્રોટીઝ ઈતિહાસ બદલીને ફાઈનલમાં એન્ટ્રી કરશે? તેના પર આખા વિશ્વની નજર છે.