રાજકોટ | તા. 03: ક્રિકેટના સૌથી ટૂંકા ફોર્મેટ એટલે કે T20 વર્લ્ડ કપ 2026નો રોમાંચ અત્યારે ચરમસીમાએ છે. સેમિફાઇનલની રેસ વધુ તેજ બની છે ત્યારે ઓસ્ટ્રેલિયાના મહાન ફાસ્ટ બોલર 'પીજન' તરીકે જાણીતા ગ્લેન મેકગ્રાએ એક એવી ભવિષ્યવાણી કરી છે જેણે ભારતીય ચાહકોમાં જોશ ભરી દીધો છે. મેકગ્રાના મતે, આ વખતે પણ ભારત વિશ્વ વિજેતા બનવાનું પ્રબળ દાવેદાર છે.
સંજુ સેમસનની 'ધમાકેદાર' ઇનિંગે જીત્યા દિલ
એક સમયે જ્યારે ટીમ ઇન્ડિયાના સેમિફાઇનલમાં પહોંચવા પર સવાલો ઉભા થઈ રહ્યા હતા, ત્યારે વેસ્ટ ઇન્ડીઝ સામેના કરો યા મરો મુકાબલામાં સંજુ સેમસને લાજવાબ બેટિંગ કરી. સંજુએ અણનમ 97 રન ફટકારીને માત્ર ભારતની જીત જ નિશ્ચિત નથી કરી, પરંતુ ટીમને સેમિફાઇનલની ટિકિટ પણ અપાવી દીધી છે. મેકગ્રાએ આ ઇનિંગની પ્રશંસા કરતા કહ્યું કે, ભારત પાસે એવા ખેલાડીઓ છે જે ગમે તેવા કપરા સંજોગોમાંથી મેચ ખેંચી લાવવાની તાકાત ધરાવે છે.
સૂર્યાની કેપ્ટન્સી અને મેકગ્રાની આગાહી
ગ્લેન મેકગ્રાએ આગાહી કરી છે કે ફાઇનલ જંગ ભારત અને દક્ષિણ આફ્રિકા વચ્ચે ખેલાઈ શકે છે. જોકે, તેમણે ભારતને ચેતવણી આપતા જણાવ્યું કે ઇંગ્લેન્ડ જેવી ટીમને હળવાશથી લેવી ભારે પડી શકે છે. મેકગ્રાએ કહ્યું, "સૂર્યકુમાર યાદવની આગેવાની હેઠળની આ ટીમમાં જે આત્મવિશ્વાસ છે તે તેમને ફાઇનલ સુધી લઈ જશે. મારા મતે ભારત ફરીથી ટ્રોફી ઉપાડશે અને દક્ષિણ આફ્રિકાને રનર-અપથી સંતોષ માનવો પડશે."
શું ભારત ઇતિહાસ દોહરાવશે?
હાલમાં જે રીતે ભારતીય બેટ્સમેનો ફોર્મમાં છે અને બોલરો શિસ્તબદ્ધ બોલિંગ કરી રહ્યા છે, તે જોતા મેકગ્રાની વાત સાચી પડતી જણાય છે. દક્ષિણ આફ્રિકાની ટીમ પણ આ વખતે જોરદાર ફોર્મમાં છે, જે ફાઇનલને બ્લોકબસ્ટર બનાવી શકે છે.
હવે જોવાનું એ રહેશે કે મેકગ્રાની આ 'ગોલ્ડન પ્રિડિક્શન' સાચી પડે છે કે કેમ, પણ અત્યારે તો ભારતીય ફેન્સ 'ચક દે ઇન્ડિયા'ના નારા લગાવી રહ્યા છે.