નવી દિલ્‍હીઃ T20 વર્લ્ડ કપ 2026 હવે તેના અંતિમ અને રોમાંચક તબક્કા તરફ આગળ વધી રહ્યો છે. આજે કોલકાતાના ઐતિહાસિક ઈડન ગાર્ડન્સ સ્ટેડિયમ ખાતે ભારત અને વેસ્ટ ઇન્ડિઝ વચ્ચે સુપર-8 ની નિર્ણાયક મેચ રમાશે. આ મુકાબલો બંને ટીમો માટે 'વર્ચ્યુઅલ નોકઆઉટ' સમાન છે, કારણ કે આ મેચમાં વિજય મેળવનારી ટીમ સીધી સેમિફાઇનલમાં પ્રવેશ કરશે.
ગ્રુપ 1 ના પોઈન્ટ ટેબલમાં અત્યારે રોમાંચક સ્થિતિ છે. વેસ્ટ ઇન્ડિઝની આફ્રિકા સામેની હાર અને ભારતની ઝિમ્બાબ્વે સામેની જીત બાદ આ મેચ ક્વાર્ટર ફાઇનલ જેવી બની ગઈ છે. જો ભારતીય ટીમ આજે વેસ્ટ ઇન્ડિઝને હરાવે છે, તો 4 પોઈન્ટ સાથે ટેબલમાં બીજા સ્થાને રહીને સેમિફાઇનલ માટે ક્વોલિફાય થશે. આ મેચનો વિજેતા 5 માર્ચે મુંબઈના વાનખેડે સ્ટેડિયમ ખાતે ઇંગ્લેન્ડ સામે બીજી સેમિફાઇનલમાં ટકરાશે.
આંકડાકીય દૃષ્ટિએ ભારતનો હાથ ઉપર જણાય છે, પરંતુ વર્લ્ડ કપના ઇતિહાસમાં વેસ્ટ ઇન્ડિઝનો રેકોર્ડ ડરામણો છે. કુલ T20 મુકાબલા: 30 (ભારતની 19 જીત, વેસ્ટ ઇન્ડિઝની 10 જીત, 1 ડ્રો) ભારતીય ધરતી પર 13 મેચમાં ભારત 8-5 થી આગળ છે. T20 વર્લ્ડ કપ ઇતિહાસમાં વેસ્ટ ઇન્ડિઝનું પલડું ભારે છે. બંને ટીમો 4 વખત ટકરાઈ છે, જેમાંથી ભારત માત્ર 1 મેચ જીતી શક્યું છે, જ્યારે 3 મેચમાં વેસ્ટ ઇન્ડિઝ વિજયી રહ્યું છે.