બ્રિજટાઉન, તા. ૨૬: વેસ્ટ ઈન્ડિઝની વિસ્ફોટક ઓલરાઉન્ડર અને કેપ્ટન હેલી મેથ્યુઝે પોતાની બેટિંગ અને બોલિંગના જોરે શ્રીલંકા સામેની અંતિમ વનડેમાં જબરદસ્ત વાપસી કરી છે. બુધવારે રમાયેલી ત્રીજી વનડેમાં મેથ્યુઝની યાદગાર સદીની મદદથી વેસ્ટ ઈન્ડિઝે શ્રીલંકાને ૬ વિકેટે હરાવીને શ્રેણીમાં પોતાની લાજ બચાવી છે. જોકે, શ્રીલંકાએ પ્રથમ બે મેચ જીતીને અગાઉથી જ આ ઐતિહાસિક શ્રેણી પોતાના નામે કરી લીધી હતી.

પ્રથમ બેટિંગ કરતા શ્રીલંકાની શરૂઆત ઘણી ખરાબ રહી હતી. કેપ્ટન ચમારી અથાપથુ ખાતું ખોલાવ્યા વિના જ મેથ્યુઝનો શિકાર બની હતી. પરંતુ હર્ષિતા સમરવિક્રમાએ (૭૦ રન) એક છેડો સાચવી રાખીને ટીમને મજબૂતી આપી હતી. અંતિમ ઓવરોમાં કવિશા દિલહારીના આક્રમક ૪૫ રનની મદદથી શ્રીલંકાએ ૫૦ ઓવરમાં ૭ વિકેટે ૨૧૭ રનનો સન્માનજનક સ્કોર બનાવ્યો હતો. વેસ્ટ ઈન્ડિઝ તરફથી કેપ્ટન મેથ્યુઝ અને કરિશ્મા રામહારકે ૨-૨ વિકેટ ઝડપી હતી.

૨૧૮ રનના લક્ષ્યાંકનો પીછો કરવા ઉતરેલી કેરેબિયન ટીમની શરૂઆત પણ નબળી રહી હતી અને માત્ર ૧૨ રનમાં ૨ વિકેટ પડી ગઈ હતી. આવી મુશ્કેલ સ્થિતિમાં હેલી મેથ્યુઝે મોરચો સંભાળ્યો અને ૧૧૯ બોલમાં ૧૩ ચોગ્ગા અને ૧ છગ્ગાની મદદથી શાનદાર ૧૦૦ રન ફટકાર્યા. આ સદી સાથે મેથ્યુઝ હવે વનડે ક્રિકેટમાં સૌથી વધુ સદી ફટકારનારી મહિલા ખેલાડીઓની યાદીમાં સંયુક્ત રીતે પાંચમા ક્રમે પહોંચી ગઈ છે. તેણે સ્ટેફની ટેલર (૩૮ રન) સાથે ૧૩૬ રનની મેચ વિનિંગ ભાગીદારી કરીને જીતનો પાયો નાખ્યો હતો.

અંતમાં ચિનેલ હેનરી અને ડીએન્ડ્રા ડોટિને સંયમપૂર્વક બેટિંગ કરી ૪ ઓવર બાકી હતી ત્યારે જ ટીમને જીત અપાવી દીધી હતી. હેલી મેથ્યુઝને તેના ઓલરાઉન્ડ દેખાવ માટે 'પ્લેયર ઓફ ધ મેચ' જાહેર કરવામાં આવી હતી, જ્યારે શ્રીલંકાની હર્ષિતા સમરવિક્રમાને સમગ્ર શ્રેણીમાં શાનદાર બેટિંગ માટે 'પ્લેયર ઓફ ધ સિરીઝ'નો એવોર્ડ મળ્યો હતો.