શ્રીલંકાના પલ્લેકેલે સ્ટેડિયમમાં T20 વર્લ્ડકપ 2026ની 45મી મેચ પાકિસ્તાન અને ઈંગ્લેન્ડ વચ્ચે રમાઈ હતી. ઈંગ્લેન્ડે પાકિસ્તાનને બે વિકેટથી હરાવીને સેમીફાઈનલમાં સ્થાન મેળવ્યું હતું. પહેલા બેટિંગ કરતા પાકિસ્તાને 20 ઓવરમાં 9 વિકેટ ગુમાવીને 164 રન બનાવ્યા હતા.

ઈંગ્લેન્ડે આ ટાર્ગેટ 19.1 ઓવરમાં હાંસલ કરીને મોટી જીત નોંધાવી હતી. ઈંગ્લેન્ડ માટે હેરી બ્રુક આ મેચનો રિયલ હીરો હતો. તેને શાનદાર સદી ફટકારી અને પ્લેયર ઓફ ધ મેચનો એવોર્ડ જીત્યો. આ સાથે ઈંગ્લેન્ડે પાકિસ્તાન સામે તેનો 100% જીતનો રેકોર્ડ જાળવી રાખ્યો છે. T20 વર્લ્ડકપમાં બંને ટીમો વચ્ચે અત્યાર સુધી 4 મેચ રમાઈ છે અને ઈંગ્લેન્ડે તે બધી જીતી લીધી છે.

આ મેચમાં પાકિસ્તાને પહેલા બેટિંગ કરવાનો નિર્ણય લીધો. સેમ અયુબ અને સાહિબઝાદા ફરહાને પહેલી વિકેટ માટે ફક્ત 14 રન બનાવ્યા. સેમ અયુબ 7 બોલમાં 7 રન બનાવીને આઉટ થયો. આ પછી કેપ્ટન સલમાન અલી આગા 6 બોલમાં 5 રન બનાવીને આઉટ થયો. આ પછી બાબર આઝમ અને ફખર ઝમાને 25-25 રનની ઈનિંગ રમી. બાબરે 24 બોલમાં આટલા રન બનાવ્યા, જ્યારે ફખરે 16 બોલનો સામનો કર્યો. આ પછી શાદાબ ખાને 11 બોલમાં 23 રનની ઈનિંગ રમી. બાકીના પાકિસ્તાની બેટ્સમેન સિંગલ ડિજિટ સ્કોરમાં આઉટ થયા. ઈંગ્લેન્ડ તરફથી લિયામ ડોસને સૌથી વધુ 3 વિકેટ લીધી. જેમી ઓવરટન અને જોફ્રા આર્ચરે 2-2 વિકેટ લીધી.

ટાર્ગેટનો પીછો કરવા ઉતરેલી ઈંગ્લેન્ડની શરૂઆત પણ સારી ન હતી. ટીમના 2 બેટ્સમેન માત્ર 17 રનના સ્કોર સાથે પેવેલિયનમાં પરત ફર્યા હતા. આ રન ચેઝમાં ઈંગ્લેન્ડનો એકમાત્ર હીરો હેરી બ્રુક હતો. તેને શાનદાર ઈનિંગ્સ રમી અને 51 બોલમાં 10 ચોગ્ગા અને 4 છગ્ગાની મદદથી 100 રન બનાવ્યા. તેના સિવાય સમ કરનએ 16 રનનું યોગદાન આપ્યું.

આ દરમિયાન વિલ જેક્સે બ્રુકને સારો સાથ આપ્યો. જેક્સે 23 બોલમાં 28 રન બનાવ્યા. પાકિસ્તાનની બોલિંગની વાત કરીએ તો શાહીન આફ્રિદીએ સૌથી વધુ 4 વિકેટ લીધી. તેના સિવાય ઉસ્માન તારિકને 2 સફળતા મળી. ઈંગ્લેન્ડ આ વર્લ્ડકપની સેમીફાઈનલમાં પહોંચનારી પહેલી ટીમ બની ગઈ છે.