હુબલી: ક્રિકેટ જગતમાં આજે એક મોટો ઉલટફેર જોવા મળ્યો છે. રણજી ટ્રોફી 2025-26ની મહાજંગ સમાન ફાઇનલ મેચમાં જમ્મુ અને કાશ્મીરની ટીમે પ્રથમ દિવસે કર્ણાટક જેવી મજબૂત ટીમ સામે શાનદાર પ્રદર્શન કરીને મેચ પર પોતાની પકડ મજબૂત કરી લીધી છે. ટોસ જીતીને પ્રથમ બેટિંગ કરતા J&K એ દિવસના અંતે 284 રન બનાવ્યા છે અને તેની માત્ર 2 જ વિકેટ પડી છે.
શુભમ પુંડિરનો શાનદાર 'શતક' પ્રહાર
જમ્મુ-કાશ્મીરની આ મજબૂત સ્થિતિનો શ્રેય શુભમ પુંડિરને જાય છે, જેમણે કર્ણાટકના પ્રસિદ્ધ કૃષ્ણા જેવા ધારદાર બોલરોનો મક્કમતાથી સામનો કરીને સદી ફટકારી હતી. પુંડિર 117 રને અણનમ છે. તેમને ઓપનર યાવર હસનનો પૂરો સાથ મળ્યો હતો, જેમણે 88 રનની મહત્વની ઈનિંગ રમી હતી. દિવસના અંતે આક્રમક બેટ્સમેન અબ્દુલ સમદ (52*) પણ અર્ધસદી ફટકારીને ક્રીઝ પર હાજર છે, જે કર્ણાટક માટે બીજા દિવસે જોખમી સાબિત થઈ શકે છે.
 
કેપ્ટન પારસ ડોગરા લોહીલુહાણ: કૃષ્ણાનો બાઉન્સર વાગતા રિટાયર્ડ હર્ટ
રમત દરમિયાન એક ડરામણી ક્ષણ પણ આવી હતી જ્યારે કર્ણાટકના ફાસ્ટ બોલર પ્રસિદ્ધ કૃષ્ણાનો એક તેઝતર્રાર બાઉન્સર કેપ્ટન પારસ ડોગરાના હેલ્મેટ પર વાગ્યો હતો. ડોગરા લોહીલુહાણ થયા હતા અને તેમને 9 રન પર જ 'રિટાયર્ડ હર્ટ' થઈને મેદાનની બહાર જવું પડ્યું હતું. જોકે, આ ઘટના બાદ જે એન્ડ કે ના બેટ્સમેનો વધુ આક્રમક બન્યા હતા અને કર્ણાટકના બોલરોને વિકેટ માટે તરસાવ્યા હતા.
તારાઓથી સજ્જ કર્ણાટક ટીમ દબાણમાં
કેએલ રાહુલ, મયંક અગ્રવાલ અને દેવદત્ત પડિક્કલ જેવા દિગ્ગજ ખેલાડીઓથી સજ્જ કર્ણાટકની ટીમ અત્યારે દબાણમાં દેખાઈ રહી છે. કર્ણાટક પોતાના 9મા રણજી ટાઇટલ માટે મેદાનમાં ઉતર્યું છે, પરંતુ જે એન્ડ કે ના બેટ્સમેનોએ આજે જે રીતે બેટિંગ કરી છે તે જોતા એવું લાગે છે કે કાશ્મીરી ટીમ પોતાનું પ્રથમ ઐતિહાસિક ટાઇટલ જીતવા માટે જીજાન લગાવી રહી છે.
હવે જોવાનું એ રહેશે કે બીજા દિવસે શું કર્ણાટકના બોલરો વાપસી કરી શકશે કે પછી શુભમ પુંડિર અને અબ્દુલ સમદ રનનો પહાડ ખડકી દેશે.