મુંબઈ:ઈન્ડિયન પ્રીમિયર લીગ (IPL) ની ૨૦૨૬ની સીઝન પહેલા ક્રિકેટ જગતમાં સૌથી મોટો પ્રશ્ન એમ.એસ. ધોનીના ભવિષ્યને લઈને ચર્ચાઈ રહ્યો હતો, જેનો અંત આવ્યો છે. ચેન્નાઈ સુપર કિંગ્સના (CSK) ટોચના સૂત્રોએ પુષ્ટિ કરી છે કે ૪૫ વર્ષીય દિગ્ગજ ખેલાડી એમ.એસ. ધોની આગામી સીઝન માટે ઉપલબ્ધ રહેશે. જોકે, વધતી ઉંમર અને શારીરિક મર્યાદાઓને ધ્યાનમાં રાખીને તે સીઝનની તમામ લીગ મેચો રમશે નહીં તેવું લગભગ નિશ્ચિત જણાઈ રહ્યું છે.
ટીમમાં નવા વિકલ્પો અને સંજુ સેમસનની ભૂમિકા:
CSK ના સૂત્રોએ પીટીઆઈ (PTI) ને નામ ન આપવાની શરતે જણાવ્યું હતું કે, ધોનીએ ચેન્નાઈ આવવાની અને સીઝન માટે પોતાની ઉપલબ્ધતાની ખાતરી આપી દીધી છે. પરંતુ આ વખતે CSK પાસે સંજુ સેમસન જેવો મજબૂત વિકલ્પ હોવાથી ધોની પરનો બોજ ઘટશે. જ્યારે ધોની મેદાનમાં નહીં હોય ત્યારે સંજુ સેમસન વિકેટકીપરની જવાબદારી સંભાળશે. આ ઉપરાંત ટીમમાં ઉર્વીલ પટેલ અને ૧૪.૨૦ કરોડમાં ખરીદાયેલા કાર્તિક શર્મા જેવા યુવા ખેલાડીઓ પણ છે, જેમને શિવમ દુબેની સાથે ફિનિશર તરીકે તૈયાર કરવામાં આવી રહ્યા છે.
શારીરિક સ્વાસ્થ્ય અને ઇમ્પેક્ટ પ્લેયર રૂલ:
છેલ્લા બે વર્ષથી ધોનીના ઘૂંટણ અને પીઠની સમસ્યાઓ જાણીતી છે. વિકેટકીપિંગ જેવી શારીરિક રીતે સખત કામગીરી સતત મેચોમાં કરવી ધોની માટે આ તબક્કે મુશ્કેલ છે. જોકે, IPL ના 'ઇમ્પેક્ટ પ્લેયર' નિયમને કારણે ધોનીની ભૂમિકા વધુ સ્પષ્ટ બની છે. પાછલી બે સીઝનમાં પણ તેની જરૂરિયાત મર્યાદિત રહી છે અને તે ઘણીવાર અંતિમ ઓવરોમાં કેમિયો (ટૂંકી અને ઝડપી બેટિંગ) રમવા માટે જ મેદાનમાં આવતો હોય છે.
ચેપૌક સાથેનો અતૂટ નાતો:
ભલે ધોની તમામ મેચો ન રમે, પરંતુ તે ચેન્નાઈના હોમ ગ્રાઉન્ડ ચેપૌક સ્ટેડિયમ પર રમાનારી મેચોમાં ચોક્કસપણે જોવા મળશે. ચેન્નાઈના ચાહકો અને ધોની વચ્ચેનો સંબંધ અતૂટ છે. જ્યારે પણ તે સ્ટેડિયમમાં પ્રવેશ કરે છે ત્યારે પ્રેક્ષકોનો ઉત્સાહ ચરમસીમાએ હોય છે. આથી ફ્રેન્ચાઇઝી એવી રણનીતિ બનાવી રહી છે કે ધોની તેના હોમ ગ્રાઉન્ડ પર રમીને ફેન્સને નિરાશ ન કરે અને સાથે જ તેનું ફિટનેસ સ્તર પણ જળવાઈ રહે. ધોનીની હાજરીથી ટીમમાં મનોબળ જળવાઈ રહેશે અને યુવા ખેલાડીઓને તેના અનુભવનો લાભ મળશે.