બેંગકોક / મુંબઈ: થાઇલેન્ડના બેંગકોકમાં આજે ક્રિકેટ ચાહકોની નજર વિમેન્સ એશિયા કપ રાઇઝિંગ સ્ટાર્સ 2026ની હાઈ-વોલ્ટેજ ફાઇનલ મેચ પર ટકેલી છે. આજે બપોરે 12:30 વાગ્યાથી શરૂ થનારા આ જંગમાં ભારતની 'ડિફેન્ડિંગ ચેમ્પિયન' ટીમ ઇન્ડિયા-A નો સામનો ટુર્નામેન્ટની એકમાત્ર અજેય ટીમ બંગલાદેશ-A સામે થશે. વર્ષ 2023માં રમાયેલી પ્રથમ સીઝનની ફાઇનલમાં ભારતે બંગલાદેશને 31 રને પરાજય આપીને ટાઇટલ જીત્યું હતું, ત્યારે આજે બંગલાદેશ પાસે તે હારનો બદલો લેવાની તક છે, જ્યારે ભારત પોતાનું વર્ચસ્વ જાળવી રાખવા મેદાનમાં ઉતરશે. એશિયન ક્રિકેટ કાઉન્સિલે આ મેચ પૂર્વે ભારતીય કેપ્ટન રાધા યાદવ અને બંગલાદેશની કેપ્ટન ફહિમા ખાતૂનનો AI દ્વારા જનરેટ કરેલો ટ્રોફી સાથેનો ફોટો સોશિયલ મીડિયા પર શેર કરી ઉત્તેજના વધારી દીધી છે.
વર્તમાન સીઝનમાં બંગલાદેશની ટીમ અત્યંત મજબૂત જણાઈ રહી છે. ગ્રુપ સ્ટેજમાં શ્રીલંકા, થાઇલેન્ડ અને મલેશિયાને હરાવ્યા બાદ સેમીફાઈનલમાં પાકિસ્તાનને કચડીને તેઓ ફાઇનલમાં પહોંચ્યા છે. બીજી તરફ, ભારતે UAE સામેની હાર સાથે નબળી શરૂઆત કરી હતી, પરંતુ ત્યારબાદ પાકિસ્તાન, નેપાળ અને સેમીફાઈનલમાં શ્રીલંકાને માત આપીને શાનદાર વાપસી કરી છે. વર્ષ 2023ની ફાઇનલમાં ભારતે 127 રન બનાવીને બંગલાદેશને 96 રનમાં ઓલઆઉટ કર્યું હતું, જે ઇતિહાસનું પુનરાવર્તન કરવા માટે ભારતીય યુવા ખેલાડીઓ સજ્જ છે.
મેદાન પરની રમતની સાથે સાથે ભારતીય ક્રિકેટ બોર્ડ (BCCI) એ એક ઐતિહાસિક જાહેરાત કરી છે. ક્રિકેટ બોર્ડે 'ક્રિકેટ અસોસિએશન ફોર ધ બ્લાઇન્ડ ઇન ઇન્ડિયા' (CABI) માટે ખાસ સપોર્ટ-ફ્રેમવર્ક જાહેર કર્યું છે. બોર્ડ હવે પુરુષ અને મહિલા બંને બ્લાઇન્ડ ક્રિકેટ ટીમોને આંતરરાષ્ટ્રીય કક્ષાની સુવિધાઓ આપશે. બોર્ડના સચિવ દેવજિત સૈકિયા અને પ્રમુખ મિથુન મન્હાસના જણાવ્યા મુજબ, હવે બ્લાઇન્ડ ક્રિકેટરોને BCCI સંલગ્ન સ્ટેડિયમમાં પ્રેક્ટિસ કરવાની તક મળશે અને દ્વિપક્ષીય શ્રેણીઓ માટે આર્થિક તેમજ લોજિસ્ટિક સપોર્ટ પણ પૂરો પાડવામાં આવશે, જેથી ક્રિકેટ ખરેખર 'સર્વસમાવેશક' રમત બની શકે.