અમદાવાદ: ભારતીય ક્રિકેટ ચાહકો માટે આવતીકાલનો રવિવાર (૨૨ ફેબ્રુઆરી ૨૦૨૬) ખરા અર્થમાં 'સુપર સન્ડે' સાબિત થવા જઈ રહ્યો છે. કાલે દેશભક્તિનો જુવાળ બે ગણો હશે, કારણ કે ટીમ ઈન્ડિયા બે અલગ-અલગ મોટા મંચ પર પોતાની તાકાત બતાવશે. એક તરફ પુરુષોના T20 વર્લ્ડ કપનો હાઈ-વોલ્ટેજ મુકાબલો છે, તો બીજી તરફ મહિલા એશિયા કપની રોમાંચક ફાઈનલ મેચ રમાશે.
સાંજે ૭:૦૦ વાગ્યે: અમદાવાદમાં વિશ્વયુદ્ધ - ભારત vs સાઉથ આફ્રિકા
નરેન્દ્ર મોદી સ્ટેડિયમમાં જ્યારે સાંજે સાત વાગ્યે સૂર્યકુમાર યાદવની ટોળી મેદાનમાં ઉતરશે ત્યારે આખું અમદાવાદ 'ઈન્ડિયા... ઈન્ડિયા...' ના નાદથી ગુંજી ઉઠશે. T20 વર્લ્ડ કપના સુપર-૮ રાઉન્ડમાં ભારતનું આ પહેલું અને અત્યંત મહત્વનું અભિયાન છે.
•    રણનીતિ: સૂર્યાની કેપ્ટનશિપમાં ભારત અજેય રહીને સુપર-૮ માં પહોંચ્યું છે.
•    પડકાર: આફ્રિકા જેવી મજબૂત ટીમ સામે ઓપનિંગ જોડીમાં અભિષેક શર્મા કે સંજુ સેમસન? તેના પર હજુ રહસ્ય અકબંધ છે, પરંતુ મેચ હાઈ-વોલ્ટેજ રહેશે તે નક્કી છે.
બપોરે ૧૨:૩૦ વાગ્યે: એશિયા કપ ફાઈનલ - ભારત A vs બાંગ્લાદેશ A
સાંજના રોમાંચ પહેલા બપોરે પણ ચાહકોને એશિયા કપનો ફાઇનલ જંગ માણવા મળશે. બેંગકોકના ટેર્ડથાઈ ક્રિકેટ ગ્રાઉન્ડ પર ભારત A અને બાંગ્લાદેશ A વચ્ચે 'ACC મહિલા એશિયા કપ રાઈઝિંગ સ્ટાર્સ ૨૦૨૬' ની ફાઈનલ જંગ રમાશે.
•    ટાઈટલ પર નજર: કેપ્ટન રાધા યાદવના નેતૃત્વમાં ભારત સતત બીજી વખત આ ખિતાબ જીતવા માટે મેદાનમાં ઉતરશે.
•    સેમિફાઈનલનો જોશ: સેમિફાઈનલમાં શાનદાર પ્રદર્શન બાદ ટીમ ઇન્ડિયાના હોસલા બુલંદ છે, જ્યારે બાંગ્લાદેશ પાકિસ્તાનને હરાવીને ફાઈનલમાં પહોંચ્યું હોવાથી તે પણ મજબૂત પડકાર આપશે.
ક્રિકેટનો ડબલ ડોઝ: રવિવારની ખાસિયત
રવિવારના દિવસે બે અલગ-અલગ ટુર્નામેન્ટ અને બે અલગ દેશોમાં રમાનારી આ મેચો ભારતીય ચાહકો માટે રજાના દિવસની શ્રેષ્ઠ ભેટ છે. બપોરે મહિલા ફાઈનલનો રોમાંચ અને સાંજે પુરુષોના વર્લ્ડ કપની ટક્કર સાથે રવિવાર 'બ્લુ જર્સી' ના રંગમાં રંગાઈ જશે.
ટીમ ઈન્ડિયા બંને મોરચે વિજયી બને તેવી કરોડો ચાહકોની પ્રાર્થના વચ્ચે હવે માત્ર ગણતરીના કલાકો બાકી છે.