કોલંબો: T20 વર્લ્ડ કપ 2026 હવે તેના નિર્ણાયક તબક્કે પહોંચ્યો છે, પરંતુ ક્રિકેટના આ મહાકુંભમાં હવે બેટ અને બોલ કરતા વધુ ચર્ચા આકાશમાં છવાયેલા કાળા વાદળોની થઈ રહી છે. શ્રીલંકાના કોલંબો અને પલ્લેકેલેમાં રમાનારી સુપર-8 ની મેચો પર વરસાદનું જોખમ એટલું વધી ગયું છે કે ઇંગ્લેન્ડ અને ન્યુઝીલેન્ડ જેવી દિગ્ગજ ટીમોના સેમિફાઇનલમાં પહોંચવાના સમીકરણો હવે કુદરતના હાથમાં હોય તેવું લાગી રહ્યું છે.
ગ્રુપ-2 માટે શ્રીલંકા બન્યું ‘ડેન્જર ઝોન’
ટુર્નામેન્ટના સુપર-8 તબક્કામાં ગ્રુપ-2 માં શ્રીલંકા, પાકિસ્તાન, ન્યુઝીલેન્ડ અને ઇંગ્લેન્ડ જેવી ટીમો છે. આ ગ્રુપની તમામ મેચો શ્રીલંકાના મેદાન પર રમાવાની છે. કોલંબોના આર. પ્રેમદાસા સ્ટેડિયમમાં ન્યુઝીલેન્ડની ત્રણ મહત્વની મેચો (વિરુદ્ધ પાકિસ્તાન, શ્રીલંકા અને ઇંગ્લેન્ડ) નિર્ધારિત છે. શ્રીલંકામાં હાલ વરસાદી માહોલ જામ્યો છે અને જો મેચો રદ થાય, તો પોઈન્ટ્સ વહેંચાઈ જવાથી મજબૂત ટીમો પણ ટુર્નામેન્ટમાંથી બહાર ફેંકાઈ શકે છે.
વરસાદ બગાડશે સેમિફાઇનલની રમત
શ્રીલંકામાં ખરાબ હવામાનને કારણે પલ્લેકેલેમાં રમાનારી ઇંગ્લેન્ડ-શ્રીલંકા અને પાકિસ્તાન-ઇંગ્લેન્ડની મેચો પર પણ સંકટ છે.
•    પોઈન્ટ્સનું ગણિત: જો મેચ વરસાદને કારણે રદ થાય, તો ટીમોને ૨ પોઈન્ટને બદલે માત્ર ૧ પોઈન્ટ મળશે.
•    નુકસાન કોને?: ગ્રુપ સ્ટેજમાં એક-એક હારનો સામનો કરી ચૂકેલી આ ટીમો માટે ૧-૧ પોઈન્ટ સેમિફાઇનલની રેસમાંથી બહાર કરી દેવા માટે પૂરતો છે.
ભારત અને ગ્રુપ-1 ની ટીમો ‘સલામત ક્ષેત્ર’ માં
બીજી તરફ, ભારત, દક્ષિણ આફ્રિકા, વેસ્ટ ઇન્ડીઝ અને ઝિમ્બાબ્વે ધરાવતું ગ્રુપ-1 અત્યંત સુરક્ષિત જણાય છે. આ ગ્રુપની તમામ મેચો ભારતમાં રમાવાની છે, જ્યાં હાલ વરસાદની કોઈ મોસમ નથી. ભારતીય મેદાનો પર મુકાબલાઓ કોઈ પણ અવરોધ વગર પાર પડે તેવી પૂરી શક્યતા છે, જે ગ્રુપ-1 ની ટીમો માટે વરદાન સાબિત થશે.
ICC ના નિર્ણય પર સવાલો
ક્રિકેટના ચાહકો અને નિષ્ણાતો હવે ICC ના શિડ્યુલ પર સવાલ ઉઠાવી રહ્યા છે. જ્યારે શ્રીલંકામાં આ સમયે વરસાદની આગાહી હતી, તો સુપર-8 જેવી મહત્વની મેચો માટે કોલંબો અને પલ્લેકેલેની પસંદગી કેમ કરવામાં આવી? શું અન્ય વેન્યુ પસંદ કરીને સેમિફાઇનલના રોમાંચને બચાવી શકાયો હોત?
હવે જોવાનું એ રહેશે કે ૨૫ અને ૨૭ ફેબ્રુઆરીએ કોલંબોમાં સૂર્યદેવ દર્શન આપે છે કે પછી મેઘરાજા ન્યુઝીલેન્ડ અને ઇંગ્લેન્ડના વર્લ્ડ કપ જીતવાના સપનાને ધોઈ નાખે છે.