અમદાવાદ: કોલંબોના મેદાન પર પાકિસ્તાનની ટીમને કારમી હાર આપ્યા બાદ ભારતીય ક્રિકેટ ટીમ પૂરા જોશ સાથે અમદાવાદ પહોંચી ગઈ છે. આગામી ૧૮ ફેબ્રુઆરીએ નરેન્દ્ર મોદી સ્ટેડિયમ ખાતે નેધરલેન્ડ્સ સામે રમાનારી મેચ માટે ખેલાડીઓનું આગમન થતા જ એરપોર્ટ પર ચાહકોનું કીડીયારું ઉભરાયું હતું. જોકે, આ દરમિયાન સોશિયલ મીડિયા પર વાયરલ થયેલા એક વીડિયોએ સૌનું ધ્યાન ખેંચ્યું છે, જેમાં જસપ્રીત બુમરાહ અન્ય ખેલાડીઓથી અલગ જોવા મળ્યો હતો.
ટીમ બસને બદલે પત્ની સાથે ખાનગી કારની પસંદગી
વાયરલ વીડિયોમાં જોઈ શકાય છે કે કેપ્ટન સૂર્યકુમાર યાદવ, હાર્દિક પંડ્યા, ઈશાન કિશન અને અક્ષર પટેલ જેવા તમામ ખેલાડીઓ એરપોર્ટની બહાર નીકળીને સીધા ટીમ બસમાં સવાર થયા હતા. પરંતુ, ટીમ ઇન્ડિયાનો મુખ્ય સ્પીડસ્ટાર જસપ્રીત બુમરાહ પોતાની પત્ની સંજના ગણેશન સાથે જોવા મળ્યો હતો. બુમરાહ પત્ની અને પોતાના સામાન સાથે ટીમ બસમાં જવાને બદલે પોતાની ખાનગી કારમાં બેસીને એરપોર્ટથી રવાના થયો હતો, જેના કારણે અનેક તર્ક-વિતર્ક સર્જાયા છે.
 
પાર્ટનર સાથે મુસાફરીના નિયમો પર ચર્ચા
સામાન્ય રીતે આઈસીસી (ICC) ટુર્નામેન્ટ દરમિયાન બીસીસીઆઈ (BCCI) ખેલાડીઓને તેમના પરિવાર કે ભાગીદારો સાથે મુસાફરી કરવા અંગે ચોક્કસ નિયમો ધરાવે છે. અગાઉ એવા અહેવાલો હતા કે બોર્ડે વર્લ્ડ કપ દરમિયાન ભાગીદારો સાથે મુસાફરી પર પ્રતિબંધ મૂક્યો છે, પરંતુ બુમરાહની આ મુલાકાત બાદ લાગે છે કે બોર્ડે અમુક કિસ્સામાં છૂટછાટ આપી છે. બીજી તરફ, હાર્દિક પંડ્યા પણ તેની કથિત ગર્લફ્રેન્ડ માહિકા શર્મા સાથે હોવાની ચર્ચાઓ સોશિયલ મીડિયા પર ચાલી રહી હતી, જોકે હાર્દિક તો ટીમ બસમાં જ જોવા મળ્યો હતો.
 
પાકિસ્તાન સામેની જીત બાદ હવે નેધરલેન્ડ્સ પર નજર
પાકિસ્તાન સામેની હાઈ-વોલ્ટેજ મેચમાં શાનદાર પ્રદર્શન કર્યા બાદ ભારતીય ટીમ અત્યારે સાતમા આસમાને છે. ૧૮ ફેબ્રુઆરીએ વિશ્વના સૌથી મોટા સ્ટેડિયમમાં નેધરલેન્ડ્સ સામેની મેચમાં ભારત પોતાની જીતનો સિલસિલો જાળવી રાખવા મેદાનમાં ઉતરશે. ખાસ કરીને અમદાવાદના વતની એવા જસપ્રીત બુમરાહ માટે આ હોમ ગ્રાઉન્ડ હોવાથી તેની પાસેથી ચાહકોને મોટી અપેક્ષા છે.
હાલ તો અમદાવાદના રસ્તાઓ પર ટીમ ઇન્ડિયાની બસ અને બુમરાહની આ ખાનગી મુસાફરી બંને સોશિયલ મીડિયા પર ‘ટોક ઓફ ધ ટાઉન’ બન્યા છે.