પલ્લેકેલે:  શ્રીલંકાના આક્રમક વિકેટકીપર બેટ્સમેન કુસલ મેન્ડિસે ICC T20 વર્લ્ડ કપ 2026 માં પોતાનું રૌદ્ર સ્વરૂપ ધારણ કર્યું છે. સોમવારે પલ્લેકેલેના મેદાન પર ઓસ્ટ્રેલિયા સામે રમાયેલી મેચમાં મેન્ડિસે શાનદાર અડધી સદી ફટકારીને ટુર્નામેન્ટમાં 'ફિફ્ટીની હેટ્રિક' પૂર્ણ કરી છે. આ સાથે જ તે ચાલુ વર્લ્ડ કપમાં સતત ત્રણ અડધી સદી ફટકારનાર વિશ્વનો પ્રથમ ખેલાડી બની ગયો છે.
દિગ્ગજોની યાદીમાં 'મેન્ડિસ'નો દબદબો
કુસલ મેન્ડિસે આ સિદ્ધિ હાંસલ કરતાની સાથે જ તેનું નામ ક્રિકેટ જગતના દિગ્ગજો વિરાટ કોહલી, મેથ્યુ હેડન, બાબર આઝમ અને કે.એલ. રાહુલ જેવા ખેલાડીઓની હરોળમાં આવી ગયું છે. આ એવા બેટ્સમેનો છે જેમણે T20 વર્લ્ડ કપના ઈતિહાસમાં સતત ત્રણ મેચમાં 50 કે તેથી વધુ રન બનાવ્યા છે. મેન્ડિસે પોતાની આ ઈનિંગ્સ દ્વારા બતાવ્યું છે કે તે હાલમાં ફોર્મના શિખરે છે.
 
સીફર્ટને પછાડી ટોચના સ્થાને કબ્જો
માત્ર રેકોર્ડ જ નહીં, પરંતુ રન બનાવવાની બાબતમાં પણ મેન્ડિસ હવે બાદશાહ બની ગયો છે. તેણે ન્યુઝીલેન્ડના ઓપનર ટિમ સીફર્ટને માત્ર 1 રનથી પાછળ છોડીને સૌથી વધુ રન બનાવનારા ખેલાડીઓની યાદીમાં પ્રથમ સ્થાન મેળવ્યું છે.
•    કુસલ મેન્ડિસ: 168 રન (3 મેચ)
•    ટિમ સીફર્ટ: 167 રન
 
મેન્ડિસની 'રન-મશીન' સફર
આ ટુર્નામેન્ટમાં મેન્ડિસની બેટિંગમાં ગજબની સાતત્યતા જોવા મળી છે:
1.    આયર્લેન્ડ સામે: 43 બોલમાં 56 રન – પ્રથમ હુમલો.
2.    ઓમાન સામે: 45 બોલમાં 61 રન – વિજયી લય જાળવી.
3.    ઓસ્ટ્રેલિયા સામે: 38 બોલમાં 51 રન – કાંગારુઓ સામે રચેલો ઈતિહાસ.
વિરાટ કોહલીનો ઓલ-ટાઇમ રેકોર્ડ હજુ પણ અકબંધ
જોકે મેન્ડિસે સતત ત્રણ અડધી સદીના રેકોર્ડમાં કોહલીની બરાબરી કરી છે, પરંતુ T20 વર્લ્ડ કપના ઈતિહાસમાં સૌથી વધુ 15 અર્ધશતક ફટકારવાનો વિરાટ કોહલીનો 'વિરાટ' રેકોર્ડ હજુ પણ માઈલસ્ટોન સમાન છે. મેન્ડિસ જે રીતે રમી રહ્યો છે તે જોતા આગામી મેચોમાં તે વધુ કીર્તિમાન સ્થાપિત કરે તેવી પૂરેપૂરી સંભાવના છે.