નવી દિલ્હી: T20 વર્લ્ડ કપ 2026ના ગ્રુપ-ડી (Group D) ની એક અત્યંત રોમાંચક મેચમાં અફઘાનિસ્તાને યુનાઈટેડ આરબ અમીરાત (UAE) ને 5 વિકેટે હરાવીને ટૂર્નામેન્ટમાં પોતાની જીતનું ખાતું ખોલ્યું છે. આ જીતના અસલી હીરો ઓલરાઉન્ડર અઝમતુલ્લાહ ઓમરઝાઈ રહ્યા હતા, જેમણે પોતાની ઘાતક બોલિંગ અને વિસ્ફોટક બેટિંગના દમ પર એકલા હાથે મેચનું પાસું પલટી નાખ્યું હતું.
ઓમરઝાઈની બોલિંગ સામે UAE ના બેટર્સ લાચાર
દિલ્હીના અરુણ જેટલી ક્રિકેટ સ્ટેડિયમમાં રમાયેલી આ મેચમાં ટોસ હારીને પ્રથમ બેટિંગ કરવા ઉતરેલી UAE ની ટીમ 20 ઓવરમાં 9 વિકેટે 160 રન બનાવી શકી હતી. UAE તરફથી શોએબ ખાને 68 રન અને આલિશાન સરાફુએ 40 રન બનાવી સંઘર્ષ કર્યો હતો. જોકે, અફઘાનિસ્તાનના અઝમતુલ્લાહ ઓમરઝાઈએ કાતિલ બોલિંગ પ્રદર્શન કરતા માત્ર 15 રન આપીને 4 મહત્વની વિકેટો ઝડપી હતી, જેના કારણે UAE ની ટીમ મોટો સ્કોર બનાવવામાં નિષ્ફળ રહી હતી. રાશિદ ખાન અને મુજીબ ઉર રહેમાને પણ શિસ્તબદ્ધ બોલિંગ કરી હતી.
મુશ્કેલ શરૂઆત બાદ અફઘાનિસ્તાનનો પલટવાર
161 રનના લક્ષ્યાંકનો પીછો કરવા ઉતરેલી અફઘાનિસ્તાનની શરૂઆત નબળી રહી હતી. સ્ટાર ઓપનર રહેમાનુલ્લાહ ગુરબાઝ શૂન્ય રને આઉટ થઈ જતા ટીમ મુશ્કેલીમાં મુકાઈ હતી. જોકે, ઇબ્રાહિમ ઝદરાને 53 રનની લડાયક અડધી સદી ફટકારી ટીમની ઇનિંગને સ્થિરતા આપી હતી. મધ્યમ ક્રમમાં દરવેશ રસૂલીએ પણ 33 રનનું ઉપયોગી યોગદાન આપ્યું હતું.
અંતિમ ઓવરોમાં ઓમરઝાઈનું તોફાન
જ્યારે મેચ ફસાયેલી લાગતી હતી, ત્યારે ફરી એકવાર મેદાનમાં અઝમતુલ્લાહ ઓમરઝાઈનો જાદુ જોવા મળ્યો. તેમણે માત્ર 21 બોલમાં 3 છગ્ગા અને 2 ચોગ્ગાની મદદથી અણનમ 40 રનની આક્રમક ઇનિંગ રમીને અફઘાનિસ્તાનને 19.2 ઓવરમાં જ વિજયી લક્ષ્ય સુધી પહોંચાડી દીધું હતું. બેટ અને બોલ બંને ક્ષેત્રે સર્વશ્રેષ્ઠ પ્રદર્શન કરીને ઓમરઝાઈએ સાબિત કરી દીધું કે તેઓ આ વર્લ્ડ કપના સૌથી શ્રેષ્ઠ ઓલરાઉન્ડરોમાંના એક છે.