અમદાવાદ: ગુજરાતના અમદાવાદમાં આવેલા વિશ્વના સૌથી મોટા નરેન્દ્ર મોદી સ્ટેડિયમ ખાતે આજે દક્ષિણ આફ્રિકાના કેપ્ટન એડન માર્કરામે પોતાના બેટથી રનનું તોફાન લાવી દીધું હતું. T20 વર્લ્ડ કપ 2026ના ગ્રુપ-D ના મહત્વના મુકાબલામાં ન્યૂઝીલેન્ડ વિરુદ્ધ રમતા માર્કરામે માત્ર 19 બોલમાં અડધી સદી ફટકારીને દક્ષિણ આફ્રિકાના ક્રિકેટ ઇતિહાસમાં નવું પ્રકરણ લખ્યું છે.

રેકોર્ડબ્રેક ઇનિંગ અને વિસ્ફોટક સ્ટ્રાઇક રેટ

ન્યૂઝીલેન્ડ દ્વારા આપવામાં આવેલા 175 રનના લક્ષ્યનો પીછો કરવા ઉતરેલી દક્ષિણ આફ્રિકાની ટીમ માટે માર્કરામ રક્ષક બનીને ઉતર્યો હતો. તેણે 284.21 ના આક્રમક સ્ટ્રાઇક રેટથી બેટિંગ કરતા 6 ચોગ્ગા અને 4 ગગનચુંબી છગ્ગા ફટકાર્યા હતા. આ ઇનિંગ સાથે તેણે ક્વિન્ટન ડી કોક (21 બોલ) અને દિગ્ગજ એબી ડી વિલિયર્સ (23 બોલ) ના અગાઉના રેકોર્ડ્સને કચડી નાખ્યા છે. સ્ટેડિયમમાં હાજર હજારો પ્રેક્ષકો માર્કરામના આક્રમક સ્ટ્રોક પ્લે જોઈને મંત્રમુગ્ધ થઈ ગયા હતા.

દક્ષિણ આફ્રિકા માટે વર્લ્ડ કપની સૌથી ઝડપી ફિફ્ટી:

બેટ્સમેન

બોલ

વિરુદ્ધ

વર્ષ

એડન માર્કરામ

19

ન્યૂઝીલેન્ડ

2026

ક્વિન્ટન ડી કોક

21

ઇંગ્લેન્ડ

2016

ક્વિન્ટન ડી કોક

22

ઇંગ્લેન્ડ

2024

એબી ડી વિલિયર્સ

23

ઇંગ્લેન્ડ

2014

સુપર-8 માં એન્ટ્રી નક્કી!

માર્કરામની આ 'કેપ્ટન ઇનિંગ' ના કારણે દક્ષિણ આફ્રિકાની ટીમ જીત તરફ મજબૂત ડગલાં માંડી રહી છે. જો આ મેચમાં દક્ષિણ આફ્રિકા વિજયી બનશે, તો તે ટુર્નામેન્ટમાં સતત ત્રીજી જીત સાથે ગ્રુપ-D માંથી સુપર-8 રાઉન્ડ માટે ક્વોલિફાય થનારી પ્રથમ ટીમ બની જશે. કિવી બોલરો પાસે માર્કરામના પ્રહારનો કોઈ જવાબ નહોતો અને અમદાવાદની પીચ પર આજે માત્ર 'પ્રોટીયા' શક્તિનો દબદબો જોવા મળ્યો હતો.