મુંબઈ: ભારતીય ક્રિકેટ ટીમના સ્ટાર ઓલરાઉન્ડર હાર્દિક પંડ્યા હાલમાં ટી20 વર્લ્ડ કપ 2026ની વ્યસ્તતા વચ્ચે પોતાની અંગત જિંદગીને લઈને ફરી એકવાર હેડલાઈન્સમાં આવ્યા છે. વેલેન્ટાઇન ડેના ખાસ અવસરે હાર્દિક પંડ્યાએ તેની ગર્લફ્રેન્ડ માહિકા શર્મા માટે કંઈક એવું કર્યું છે જેની ચર્ચા સોશિયલ મીડિયા પર જોરશોરથી થઈ રહી છે. હાર્દિકે પોતાના ગળા પર એક વિશેષ ટેટૂ બનાવીને માહિકા પ્રત્યેના પોતાના પ્રેમને કાયમી સ્વરૂપ આપ્યું છે.
રાત્રે ૨ વાગ્યે ટેટૂ સ્ટુડિયોમાં આશ્ચર્યજનક એન્ટ્રી
નતાશા સ્ટેનકોવિકથી અલગ થયા બાદ હાર્દિક પંડ્યાના જીવનમાં માહિકા શર્માના પ્રવેશની અફવાઓ લાંબા સમયથી ચાલતી હતી, પરંતુ આ વેલેન્ટાઇન ડે પર હાર્દિકે તમામ અટકળો પર મહોર મારી દીધી છે. ૧૪ ફેબ્રુઆરીની મધ્યરાત્રિએ અંદાજે ૨ વાગ્યે હાર્દિક અને માહિકા મુંબઈના પ્રખ્યાત 'એલિયન્સ ટેટૂ' સ્ટુડિયો ખાતે પહોંચ્યા હતા. ટેટૂ આર્ટિસ્ટની ટીમે સોશિયલ મીડિયા પર શેર કરેલી વિગતો મુજબ, હાર્દિક આ પળને માહિકા માટે અત્યંત યાદગાર અને સ્પેશિયલ બનાવવા માંગતા હતા.
ટેટૂની પાછળ છુપાયેલો છે ગહન અર્થ
હાર્દિકે તેના ગળા પર જે ટેટૂ બનાવ્યું છે તેમાં બે ચિત્તાની આકૃતિઓ છે, જે શક્તિ અને આત્મીયતાનું પ્રતીક છે. આ ટેટૂમાં એક ચિત્તો વાસ્તવિક અને બોલ્ડ છે, જે હાર્દિકના મેદાન પરના જુસ્સા અને શક્તિને દર્શાવે છે. જ્યારે બીજો ચિત્તો રેખાઓ દ્વારા એવી રીતે કંડારવામાં આવ્યો છે કે તેના વળાંકોથી માહિકાના નામનો પ્રથમ અક્ષર ‘M’ બને છે. હાર્દિકની ઈચ્છા હતી કે માહિકાનું પહેલું ટેટૂ તેના ગળા પર હોય, જે નાનું હોવા છતાં અત્યંત પ્રભાવશાળી અને તેની હંમેશા નજીક રહે.
દિલ્હીમાં રોમેન્ટિક સ્વાગત અને 'લેડી લક'ની અસર
વેલેન્ટાઇન ડેની ઉજવણી માટે માહિકા જ્યારે દિલ્હી પહોંચી ત્યારે હાર્દિકે હોટલના રૂમમાં લાલ ગુલાબના વિશાળ બુકે સાથે તેનું સ્વાગત કર્યું હતું. આ રોમેન્ટિક પળોની તસવીર શેર કરતા માહિકાએ હાર્દિકને તેના જીવનનો ‘મેન ઓફ ધ મેચ’ ગણાવ્યો હતો. હાર્દિકે અગાઉ પણ સ્વીકાર્યું છે કે માહિકા તેના જીવનમાં ‘લેડી લક’ સાબિત થઈ છે. મુશ્કેલ સમયમાં માહિકાના સમર્થનને કારણે જ તે ક્રિકેટના મેદાનમાં શાનદાર વાપસી કરી શક્યો છે તેમ તેણે એક ઈન્ટરવ્યુમાં જણાવ્યું હતું.
સંબંધો પર મજબૂત મહોર
થોડા સમય પહેલા હાર્દિકે તેના ૩૨મા જન્મદિવસની ઉજવણી પણ માહિકા સાથે કરી હતી, જેમાં માહિકાએ તેને ક્રાઉન પહેરાવ્યો હોય તેવા વીડિયો વાયરલ થયા હતા. હવે વર્લ્ડ કપના ચાલુ શિડ્યુલ વચ્ચે ગળા પર આ કાયમી ટેટૂ બનાવીને હાર્દિકે સાબિત કરી દીધું છે કે માહિકા તેના જીવનમાં અત્યંત વિશેષ સ્થાન ધરાવે છે. પ્રશંસકો પણ આ જોડીને સોશિયલ મીડિયા પર અભિનંદન આપી રહ્યા છે અને આશા વ્યક્ત કરી રહ્યા છે કે હાર્દિકનું આ ફોર્મ ભારતને વર્લ્ડ કપ જીતાડવામાં મદદરૂપ થશે.