રાજકોટ: તા. 13 ભારતીય ક્રિકેટના સ્ટાર ઓલરાઉન્ડર હાર્દિક પંડ્યાએ T20 વર્લ્ડ કપ 2026માં પોતાની વિસ્ફોટક બેટિંગથી નામિબિયાના બોલરોને બરાબરના ધોઈ નાખ્યા છે. ગુરુવારે રમાયેલી આ મેચમાં હાર્દિકે માત્ર રન જ નથી બનાવ્યા, પરંતુ ટૂર્નામેન્ટનો સૌથી લાંબો છગ્ગો ફટકારીને આખા સ્ટેડિયમને સ્તબ્ધ કરી દીધું હતું. તેની આ આક્રમક રમતને જોઈને વિરોધી ટીમ તો ઠીક, સ્ટેડિયમમાં બેઠેલા હજારો ચાહકો પણ મંત્રમુગ્ધ થઈ ગયા હતા.

109 મીટરની રેકોર્ડબ્રેક સિક્સર

હાર્દિક પંડ્યાએ પોતાની અડધી સદી દરમિયાન એક એવો શોટ માર્યો કે બોલ સીધો સ્ટેડિયમની બહાર જઈને પડ્યો. આ છગ્ગો 109 મીટર લાંબો હતો, જે વર્તમાન વર્લ્ડ કપનો સૌથી મોટો સિક્સર નોંધાયો છે. આશ્ચર્યની વાત એ છે કે, આ પહેલા આ રેકોર્ડ સાથી ખેલાડી શિવમ દુબેના નામે હતો, પરંતુ હાર્દિકે માત્ર બે બોલના અંતરે જ શિવમનો રેકોર્ડ તોડીને પોતાનું વર્ચસ્વ જમાવી દીધું હતું.

પંડ્યાની 25મી આંતરરાષ્ટ્રીય ફિફ્ટી

નામિબિયા સામેની આ મેચમાં હાર્દિકે માત્ર 28 બોલમાં 52 રન ઝૂડી કાઢ્યા હતા. આ તોફાની ઇનિંગમાં તેણે 4 શાનદાર ચોગ્ગા અને 4 વિશાળ છગ્ગા ફટકાર્યા હતા. પંડ્યાની T20 આંતરરાષ્ટ્રીય કારકિર્દીની આ 25મી અડધી સદી હતી. પંડ્યા અને અન્ય બેટ્સમેનોના દમદાર પ્રદર્શનને કારણે ભારતની ટીમે નિર્ધારિત 20 ઓવરમાં 9 વિકેટ ગુમાવીને 209 રનનો વિશાળ સ્કોર ખડકી દીધો હતો.

ટીમ ઈન્ડિયાનો દબદબો

ભારત માટે આ મેચમાં હાર્દિકની ફોર્મમાં પરત ફરવું એ ટુર્નામેન્ટના અંતિમ તબક્કા માટે એક મોટો સકારાત્મક સંકેત છે. સોશિયલ મીડિયા પર હાર્દિકના 109 મીટરના છગ્ગાનો વીડિયો ઝડપથી વાયરલ થઈ રહ્યો છે, જેમાં કોમેન્ટેટર્સ પણ તેની પાવર હિટિંગના વખાણ કરતા થાકતા નથી.

હવે જ્યારે ભારત સેમી-ફાઈનલની નજીક છે, ત્યારે હાર્દિકની આ 'ફિનિશર' તરીકેની ભૂમિકા ટીમ ઈન્ડિયા માટે અત્યંત મહત્વની સાબિત થશે.