નવી દિલ્હી, તા. 6: T20 વર્લ્ડ કપ 2026ના શંખનાદને હવે ગણતરીના કલાકો જ બાકી છે, ત્યારે ભારતીય ક્રિકેટ ચાહકો માટે માઠા સમાચાર સામે આવ્યા છે. ટીમ ઈન્ડિયાના ઉભરતા ફાસ્ટ બોલર હર્ષિત રાણા ઈજાના કારણે વર્લ્ડ કપની બહાર થાય તેવી પ્રબળ શક્યતા છે. શનિવારે યુએસએ સામેની પ્રથમ મેચ પહેલા જ ભારતની બોલિંગ લાઇન-અપને આંચકો લાગ્યો છે.
મેદાન પર લંગડાતા બહાર નીકળ્યો ખેલાડી
24 વર્ષીય હર્ષિત રાણાને ડીવાય પાટિલ સ્ટેડિયમમાં દક્ષિણ આફ્રિકા સામેની પ્રેક્ટિસ મેચ દરમિયાન જમણા ઘૂંટણમાં ગંભીર ઈજા થઈ હતી. મેચમાં માત્ર એક ઓવર ફેંક્યા બાદ તે પીડામાં જોવા મળ્યો હતો અને મેદાનની બહાર લંગડાતા નીકળ્યો હતો. મેડિકલ રિપોર્ટ અને સ્કેનિંગ બાદ જાણવા મળ્યું છે કે તેની ઘૂંટણની સ્થિતિ નાજુક છે અને નિષ્ણાત ડોક્ટરોએ તેને સર્જરી કરાવવાની સલાહ આપી છે.
કેપ્ટન સૂર્યાની પ્રતિક્રિયા
ભારતીય ટીમના કેપ્ટન સૂર્યકુમાર યાદવે પ્રેસ કોન્ફરન્સમાં જણાવ્યું કે, "હર્ષિતને સત્તાવાર રીતે હજુ બહાર કરવામાં આવ્યો નથી, પરંતુ તેની ફિટનેસ હાલમાં જોખમમાં છે. મેડિકલ ટીમ તેની તપાસ કરી રહી છે અને આજે સાંજ સુધીમાં અંતિમ નિર્ણય લેવામાં આવશે." જો હર્ષિત બહાર થશે, તો તેની જગ્યાએ રિઝર્વ ખેલાડીઓમાંથી કોને સ્થાન મળશે તે જોવું રસપ્રદ રહેશે.
ભારત માટે આ ઈજા ચિંતાનો વિષય છે કારણ કે હર્ષિત રાણા તેની ગતિ અને વેરિએશનથી મધ્ય ઓવરોમાં ઘણો ઉપયોગી સાબિત થઈ શકત. હવે આખી ટીમ અને ચાહકોની નજર સાંજની સત્તાવાર જાહેરાત પર ટકેલી છે.