મુંબઈ : મુંબઈના બાંદ્રા-કુર્લા કોમ્પ્લેક્સ (BKC) ખાતે રમાઈ રહેલી રણજી ટ્રોફીની મેચમાં આજે એક અજીબ દૃશ્ય કેમેરામાં કેદ થયું હતું. મુંબઈના સ્ટાર બેટ્સમેન સરફરાઝ ખાન, તેના ભાઈ મુશીર ખાન અને હિમાંશુ સિંહ ફિલ્ડિંગ દરમિયાન માસ્ક પહેરેલા જોવા મળ્યા હતા. શરૂઆતમાં પ્રેક્ષકોને લાગ્યું કે કોઈ બીમારીનો ડર છે, પરંતુ અસલ કારણ મેદાનની આસપાસ ચાલી રહેલું બાંધકામ (Construction) હતું. મેદાનની નજીક થઈ રહેલા કામને કારણે હવામાં ધૂળ અને પ્રદૂષણનું સ્તર એટલું વધી ગયું હતું કે ખેલાડીઓને શ્વાસ લેવામાં તકલીફ પડી રહી હતી, જેના કારણે સાવચેતીના ભાગરૂપે તેમણે માસ્ક પહેરવાનો નિર્ણય લીધો હતો.

દિલ્હીની ટીમ 221 રનમાં ધરાશાયી

મેચની વાત કરીએ તો, પ્રદૂષણની સાથે દિલ્હીની ટીમ મુંબઈના બોલરો સામે પણ સંઘર્ષ કરતી જોવા મળી હતી. દિલ્હી તરફથી ઓપનર સનત સાંગવાને શાનદાર સદી ફટકારી એકલા હાથે લડત આપી હતી, પરંતુ સામે છેડે અન્ય કોઈ બેટ્સમેન ટકી શક્યો નહીં. આયુષ બદોની અને પ્રિયાંશ આર્યની ગેરહાજરીમાં દિલ્હીની બેટિંગ લાઇન-અપ નબળી પડી અને આખી ટીમ પ્રથમ ઇનિંગમાં માત્ર 221 રન બનાવીને ઓલઆઉટ થઈ ગઈ. મુંબઈ તરફથી મોહિત અવસ્થીએ તરખાટ મચાવતા 5 વિકેટ ઝડપી હતી.

મુંબઈની પણ નબળી શરૂઆત

દિલ્હીને સસ્તામાં ઓલઆઉટ કર્યા બાદ મુંબઈની શરૂઆત પણ સારી રહી નહોતી. ઓપનર આકાશ આનંદ માત્ર 4 રન બનાવીને પેવેલિયન ભેગો થયો હતો. પ્રથમ દિવસના અંતે મુંબઈનો સ્કોર 13/1 રહ્યો છે અને તેઓ હજુ પણ દિલ્હી કરતા 208 રન પાછળ છે. બીજા દિવસે સરફરાઝ ખાન અને કેપ્ટન સિદ્ધેશ લાડ પર મુંબઈને મજબૂત સ્કોર સુધી લઈ જવાની જવાબદારી રહેશે.

ક્રિકેટના મેદાન પર ખેલાડીઓનું માસ્ક પહેરીને રમવું એ વધતા જતા શહેરી પ્રદૂષણ અને ખેલાડીઓના સ્વાસ્થ્ય સામે ઉભા થયેલા જોખમ તરફ ઈશારો કરે છે. આ દૃશ્યે ફરી એકવાર દિલ્હી અને મુંબઈ જેવા શહેરોમાં હવાની ગુણવત્તા (Air Quality) અંગેની ચર્ચા છેડી દીધી છે.