નવી દિલ્હી, તા. 28 : 7 ફેબ્રુઆરીથી શરૂ થઈ રહેલા T20 વર્લ્ડ કપ 2026 માટે ભારતીય ટીમે કમર કસી લીધી છે. આ મેગા ઈવેન્ટ પહેલા ભારતીય સિનિયર ટીમને પ્રેક્ટિસ પૂરી પાડવા અને યુવા પ્રતિભાઓને ચકાસવા માટે આયુષ બદોની અને પ્રિયાંશ આર્યની પસંદગી ભારત 'A' ટીમમાં કરવામાં આવી છે. આ બંને ખેલાડીઓને દિલ્હીની રણજી ટ્રોફી ટીમમાંથી મુક્ત કરવામાં આવ્યા છે જેથી તેઓ રાષ્ટ્રીય કર્તવ્ય નિભાવી શકે.
વર્લ્ડ કપ પહેલા વોર્મ-અપનો રોમાંચ
ભારતીય ટીમ વર્લ્ડ કપના મુખ્ય સ્ટેજ પર ઉતરતા પહેલા કુલ ત્રણ પ્રેક્ટિસ મેચ રમશે. જેમાંથી બે મેચમાં ભારત 'A' ટીમ મેદાનમાં ઉતરશે. ભારત 'A' ટીમ ૨ ફેબ્રુઆરીએ નવી મુંબઈમાં યુનાઈટેડ સ્ટેટ્સ (USA) સામે ટકરાશે, જ્યારે ૬ ફેબ્રુઆરીએ બેંગલુરુમાં નામિબિયા સામે બાથ ભીડશે. આ મેચો યુવા ખેલાડીઓ માટે પસંદગીકારોની નજરમાં આવવાની સુવર્ણ તક છે.
દિલ્હીના સ્ટાર્સ પર નજર
આયુષ બદોની તેની વિસ્ફોટક બેટિંગ માટે જાણીતો છે અને તે લાલ તથા સફેદ બંને બોલથી શાનદાર પ્રદર્શન કરી રહ્યો છે. બીજી તરફ પ્રિયાંશ આર્યએ સફેદ બોલના ક્રિકેટમાં પોતાની ક્ષમતા સાબિત કરી છે. આ બંનેની ગેરહાજરીમાં હવે રણજી ટ્રોફીમાં મુંબઈ સામેની મહત્વની મેચમાં આયુષ દોજા દિલ્હીની ટીમનું નેતૃત્વ કરશે.
વોર્મ-અપ મેચોનું ખાસ શેડ્યૂલ
•    ૨ ફેબ્રુઆરી: ભારત A વિ. યુએસએ – નવી મુંબઈ (સાંજે ૫:૦૦)
•    ૪ ફેબ્રુઆરી: ભારત વિ. દક્ષિણ આફ્રિકા – નવી મુંબઈ (સાંજે ૭:૦૦)
•    ૬ ફેબ્રુઆરી: ભારત A વિ. નામિબિયા – બેંગલુરુ (સાંજે ૫:૦૦)
નોંધનીય છે કે ઓસ્ટ્રેલિયા અને ઈંગ્લેન્ડ જેવી ટીમોએ પ્રેક્ટિસ મેચ ન રમવાનો નિર્ણય લીધો છે કારણ કે તેઓ અન્ય દ્વિપક્ષીય શ્રેણીઓમાં વ્યસ્ત છે. ભારત માટે આ પ્રેક્ટિસ મેચો ખેલાડીઓના ફોર્મ અને કોમ્બિનેશન નક્કી કરવા માટે અત્યંત મહત્વની સાબિત થશે.