મેલબોર્ન, તા. 27 : ઓસ્ટ્રેલિયન ઓપનમાં અત્યારે માત્ર ખેલાડીઓ વચ્ચે જ નહીં, પરંતુ ખેલાડીઓ અને કુદરત વચ્ચે પણ જંગ જામ્યો છે. મેલબોર્નના પ્રચંડ સૂર્યપ્રકાશ અને 45 ડિગ્રી સેલ્સિયસ સુધી પહોંચેલા તાપમાન વચ્ચે મંગળવારે આર્યના સબાલેન્કા અને એલેક્ઝાન્ડર ઝ્વેરેવે પોતપોતાની મેચો જીતીને સેમિફાઇનલમાં પ્રવેશ કરી લીધો છે. વર્ષના આ સૌથી ગરમ દિવસે ગરમી એટલી વિકરાળ હતી કે મેલબોર્ન પાર્ક ખાતે પ્રેક્ષકોની સંખ્યા પણ અડધી થઈ ગઈ હતી.
બેલારુસની સ્ટાર ખેલાડી અને ટોચની ક્રમાંકિત આર્યના સબાલેન્કાએ અમેરિકાની 18 વર્ષીય ઇવા જોવિકને 6-3, 6-0 થી હરાવીને પોતાનો દબદબો જાળવી રાખ્યો હતો. સબાલેન્કાએ મેચ બાદ મજાકમાં કહ્યું હતું કે, "અમે મહિલાઓ પુરુષો કરતાં વધુ મજબૂત છીએ, એટલે જ પુરુષોની મેચ વખતે છત બંધ કરવી પડી!" જોકે, સબાલેન્કાની મેચ પૂર્ણ થયા બાદ તરત જ તાપમાન વધતા આયોજકોએ 'હીટ સ્ટ્રેસ સ્કેલ' મુજબ બાહ્ય કોર્ટ પરની રમતો અટકાવી દીધી હતી અને મુખ્ય એરેનાની છત બંધ કરી દીધી હતી.
બીજી તરફ, પુરુષ સિંગલ્સમાં એલેક્ઝાન્ડર ઝ્વેરેવે અમેરિકાના લર્નર ટિએન સામે ભારે સંઘર્ષ કરવો પડ્યો હતો. ગરમીથી બચવા માટે રોડ લેવર એરેનાની છત બંધ કરવામાં આવી અને એસી (AC) ચાલુ કરવામાં આવ્યું હોવા છતાં, ઝ્વેરેવને આ જીત મેળવવા માટે પરસેવો પાડવો પડ્યો હતો. તેણે ટિએનને 6-3, 6-7, 6-1, 7-6 થી હરાવીને અંતિમ ચારમાં સ્થાન મેળવ્યું છે. ઝ્વેરેવે સ્વીકાર્યું હતું કે એસીના કારણે સ્થિતિ થોડી સુધરી હતી, બાકી બહાર રમવું અશક્ય હતું.
હવે ચાહકોની નજર સાંજના સત્ર પર છે, જ્યાં સ્પેનિશ સ્ટાર કાર્લોસ અલ્કારાઝ ઓસ્ટ્રેલિયાના લાડલા ખેલાડી એલેક્સ ડી મિનૌર સામે ટકરાશે. તેમજ મહિલા વર્ગમાં કોકો ગૌફ અને એલિના સ્વિટોલીના વચ્ચે સેમિફાઇનલમાં પહોંચવા માટે જોરદાર ટક્કર જોવા મળશે. મેલબોર્નનું હવામાન હવે આ ટુર્નામેન્ટના પરિણામોમાં નિર્ણાયક ભૂમિકા ભજવી રહ્યું હોય તેમ લાગી રહ્યું છે.