નવી દિલ્હી/કોલકાતા: ક્રિકેટના મેદાનમાં હજુ તો રમત શરૂ પણ નથી થઈ, ત્યાં જ મેદાનની બહારના રાજકીય અને સુરક્ષાના તણાવે રમતનું આખું શિડ્યૂલ બદલી નાખ્યું છે. બાંગ્લાદેશ ક્રિકેટ બોર્ડ (BCB) દ્વારા ભારતમાં રમવાનો ઇનકાર કરાતા, ICC એ કડક વલણ અપનાવીને તેમને ટૂર્નામેન્ટમાંથી બહાર કરી દીધા છે. આ ખાલી પડેલી જગ્યા હવે સ્કોટલેન્ડની ટીમ ભરશે. સ્કોટલેન્ડને ગ્રુપ C માં સ્થાન મળ્યું છે, જ્યાં તેનો સામનો ઈંગ્લેન્ડ અને વેસ્ટ ઈન્ડિઝ જેવી ચેમ્પિયન ટીમો સાથે થશે. ચાલો જાણીએ આ મોટા ફેરફાર બાદ હવે કેવું છે નવું શેડ્યૂલ.

બાંગ્લાદેશની જીદ તેમને ભારે પડી છે. BCB એ માંગ કરી હતી કે તેમની મેચો ભારતને બદલે શ્રીલંકા ખસેડવામાં આવે, પરંતુ ICC એ આ માંગ ફગાવી દીધી હતી. પરિણામે, હવે સ્કોટલેન્ડની ટીમ કોલકાતા અને મુંબઈના મેદાન ગજવશે. સ્કોટલેન્ડનું અભિયાન 7 ફેબ્રુઆરીએ કોલકાતાના ઐતિહાસિક ઈડન ગાર્ડન્સ ખાતે વેસ્ટ ઈન્ડિઝ સામે શરૂ થશે. ત્યારબાદ, 9 ફેબ્રુઆરીએ તેઓ પહેલીવાર વર્લ્ડ કપ રમી રહેલી ઈટાલીની ટીમ સામે ટકરાશે. 14 ફેબ્રુઆરીએ વેલેન્ટાઇન ડે પર ક્રિકેટ ચાહકોને સ્કોટલેન્ડ અને ઈંગ્લેન્ડ વચ્ચેનો જબરદસ્ત મુકાબલો જોવા મળશે.

બીજી તરફ, સમગ્ર દુનિયા જેની રાહ જોઈ રહી છે તે ભારત-પાકિસ્તાન વચ્ચેની હાઈ-વોલ્ટેજ મેચની તારીખ પણ લોક થઈ ગઈ છે. 15 ફેબ્રુઆરીએ શ્રીલંકાના કોલંબો સ્થિત આર. પ્રેમદાસા સ્ટેડિયમમાં આ બંને કટ્ટર હરીફો આમને-સામને હશે. ભારત તેની પ્રથમ મેચ 7 ફેબ્રુઆરીએ મુંબઈમાં યુએસએ સામે રમીને પોતાના ટાઈટલ બચાવવાના અભિયાનની શરૂઆત કરશે. પાકિસ્તાનની તમામ મેચો શ્રીલંકાના મેદાન પર યોજાશે, જેથી કોઈ પણ રાજકીય વિવાદ રમતને અસર ન કરે.

ટૂર્નામેન્ટનું ફાઈનલ શિડ્યૂલ પણ અત્યંત રોમાંચક છે. 7 ફેબ્રુઆરીથી શરૂ થતો આ ક્રિકેટનો મહાકુંભ 8 માર્ચ સુધી ચાલશે. જો પાકિસ્તાન ફાઈનલમાં પહોંચશે તો ખિતાબી જંગ કોલંબોમાં રમાશે, નહીં તો 8 માર્ચે અમદાવાદનું નરેન્દ્ર મોદી સ્ટેડિયમ દુનિયાના નવા T20 ચેમ્પિયનનું સાક્ષી બનશે. બાંગ્લાદેશના બહાર થવાથી એશિયન ક્રિકેટ ચાહકોમાં નિરાશા છે, પરંતુ સ્કોટલેન્ડ જેવી ઉભરતી ટીમ માટે આ પોતાની તાકાત બતાવવાની સુવર્ણ તક છે.