વડોદરા: મહિલા પ્રીમિયર લીગ (WPL) 2026માં ગુજરાત જાયન્ટ્સે ફરી એકવાર પોતાનો દબદબો સાબિત કર્યો છે. વડોદરાના મેદાન પર રમાયેલી મેચમાં ગુજરાતી સિંહણોએ UP વોરિયર્ઝને ૪૫ રને હરાવીને ટૂર્નામેન્ટમાં ધમાકેદાર વાપસી કરી છે. સોફી ડિવાઇનના ઓલરાઉન્ડ દેખાવ અને રાજેશ્વરી ગાયકવાડની ધારદાર બોલિંગ સામે UPની આખી ટીમ પત્તાની માફક વિખેરાઈ ગઈ હતી.
 
સોફી ડિવાઇનનું બેટિંગ તોફાન
મેચમાં પ્રથમ બેટિંગ કરતા ગુજરાત જાયન્ટ્સે નિર્ધારિત ૨૦ ઓવરમાં ૮ વિકેટે ૧૫૩ રનનો સન્માનજનક સ્કોર બનાવ્યો હતો. કેપ્ટન બેથ મૂનીએ ૩૮ રનનું યોગદાન આપ્યું હતું, પરંતુ સાચો હીરો સોફી ડિવાઇન સાબિત થઈ. સોફી એ છેલ્લી ઓવરમાં બે જોરદાર છગ્ગા ફટકારીને ૧૬ રન વસૂલ્યા અને પોતાની શાનદાર અડધી સદી (૫૦ રન) પૂર્ણ કરી હતી. આ આક્રમક બેટિંગના કારણે ગુજરાતની ટીમ મજબૂત સ્કોર સુધી પહોંચી શકી હતી.
રાજેશ્વરી ગાયકવાડનો સ્પિન જાદુ
૧૫૪ રનના લક્ષ્યનો પીછો કરવા ઉતરેલી UP વોરિયર્ઝની ટીમ શરૂઆતથી જ દબાણમાં જોવા મળી હતી. મેગ લેનિંગ અને કિરણ નવગિરે સસ્તામાં આઉટ થતા UPની ટીમ મુશ્કેલીમાં મુકાઈ ગઈ હતી. રાજેશ્વરી ગાયકવાડે માત્ર ૧૬ રન આપીને ૩ મહત્વની વિકેટો ઝડપીને UPના મધ્યક્રમની કમર તોડી નાખી હતી. સોફી ડિવાઇને પણ બોલિંગમાં કમાલ કરતા ૨ વિકેટો ઝડપી હતી.
UP વોરિયર્ઝની શરણાગતિ
UP તરફથી ફોબી લિચફિલ્ડે ૩૨ રન બનાવીને લડત આપવાનો પ્રયાસ કર્યો હતો, પરંતુ અન્ય કોઈ બેટ્સમેન તેને સાથ આપી શક્યા નહોતા. હરલીન દેઓલ ૧૨ બોલમાં માત્ર ૩ રન બનાવી આઉટ થઈ હતી. અંતે ક્લો ટ્રાયને ૩૦ રન બનાવી એકલી લડાઈ લડી હતી, પરંતુ તે ટીમને જીત અપાવવા માટે પૂરતું નહોતું. UPની આખી ટીમ ૧૭.૩ ઓવરમાં માત્ર ૧૦૮ રન બનાવી ઓલઆઉટ થઈ ગઈ હતી.
પોઈન્ટ ટેબલ અપડેટ: આ જંગી જીત સાથે ગુજરાત જાયન્ટ્સ હવે પોઈન્ટ ટેબલમાં બીજા ક્રમે પહોંચી ગયું છે. વડોદરાના ચાહકો માટે આ જીત ઘરેલુ મેદાન પરની સૌથી મોટી ભેટ સાબિત થઈ છે.