મુંબઈ: મહિલા પ્રીમિયર લીગ (WPL) 2026ની શરૂઆત પહેલા મુંબઈ ઈન્ડિયન્સે એક મોટો નિર્ણય લીધો છે. ટીમની વિકેટકીપર જી. કમલિની ઈજાના કારણે ટુર્નામેન્ટમાંથી બહાર થઈ જતાં, તેના સ્થાને મધ્યપ્રદેશની ઉભરતી સ્ટાર અને ઘાતક સ્પિનર વૈષ્ણવી શર્માને ટીમમાં સામેલ કરવામાં આવી છે. મુંબઈ ઈન્ડિયન્સે આ યુવા ખેલાડીને ₹30 લાખની બેઝ પ્રાઈસ પર કરારબદ્ધ કરી છે.
 મધ્યપ્રદેશના ચંબલ વિસ્તારની રહેવાસી વૈષ્ણવી શર્માએ ખૂબ જ ટૂંકા ગાળામાં ક્રિકેટ જગતમાં પોતાનું નામ બનાવ્યું છે. તેના પિતા નરેન્દ્ર શર્મા જ્યોતિષી છે, પરંતુ વૈષ્ણવીએ મેદાન પર પોતાની મહેનતથી નસીબ બદલી નાખ્યું છે. તેણે તાજેતરમાં શ્રીલંકા સામેની T20 શ્રેણીમાં ભારત માટે ડેબ્યૂ કર્યું હતું. અંડર-19 વર્લ્ડ કપમાં તેણે માત્ર 7 મેચમાં 17 વિકેટ ઝડપીને ભારતને જીત અપાવવામાં સિંહફાળો આપ્યો હતો, જે એક રેકોર્ડ છે.
માત્ર 20 વર્ષની ઉંમરે વૈષ્ણવી શર્મા સોશિયલ મીડિયા પર સેન્સેશન બની ગઈ છે. તેના લાખો ફોલોઅર્સ છે અને તેના દેખાવને કારણે તેને સોશિયલ મીડિયા પર ઘણો પ્રેમ મળી રહ્યો છે. જોકે, વૈષ્ણવીનું ધ્યાન હંમેશા તેની બોલિંગ પર જ રહ્યું છે. 2022માં તે ડોમેસ્ટિક ક્રિકેટમાં સૌથી વધુ વિકેટ લેનાર બોલર બની હતી, જે તેની પ્રતિભાનો પુરાવો છે.
 મુંબઈ ઈન્ડિયન્સ હંમેશા યુવા પ્રતિભાઓને તક આપવા માટે જાણીતું છે. વૈષ્ણવી ડાબા હાથની સ્પિન બોલર હોવાથી હરમનપ્રીત કૌરની ટીમ માટે તે પ્લેઈંગ-11માં એક મજબૂત વિકલ્પ પૂરો પાડશે. હરમનપ્રીત અને કોચિંગ સ્ટાફને આશા છે કે વૈષ્ણવી મધ્ય ઓવરોમાં પોતાની સ્પિનના જાદુથી વિરોધી ટીમના બેટ્સમેનોને રોકવામાં સફળ રહેશે. વૈષ્ણવી શર્માનું મુંબઈ ઈન્ડિયન્સમાં જોડાવું એ માત્ર તેના માટે જ નહીં, પણ મધ્યપ્રદેશ ક્રિકેટ માટે પણ ગર્વની ક્ષણ છે. હવે જોવાનું એ રહેશે કે તે WPLના મોટા સ્ટેજ પર પોતાની સ્પિનનો જાદુ કેવી રીતે ચલાવે છે.