નવી દિલ્હી, તા. 20: ભારતીય બેડમિન્ટનને વિશ્વ સ્તરે નવી ઓળખ અપાવનાર અને ઓલિમ્પિક મેડલ વિજેતા સાયના નેહવાલે આખરે રમતને સત્તાવાર રીતે અલવિદા કહી દીધું છે. છેલ્લા બે વર્ષથી કોર્ટથી દૂર રહેલી સાયનાએ પુષ્ટિ કરી છે કે તેના ઘૂંટણની હાલત એટલી ખરાબ થઈ ગઈ છે કે હવે તે પ્રોફેશનલ બેડમિન્ટનની કઠિન શારીરિક માંગણીઓ પૂરી કરી શકે તેમ નથી.
પીવી સિંધુ નહીં, આ હતી અસલી હરીફ
સાયનાએ એક પોડકાસ્ટ દરમિયાન તેની કારકિર્દીના સૌથી પડકારજનક સમયને યાદ કરતા કહ્યું કે, લોકો ભલે તેની અને પીવી સિંધુ વચ્ચેની સ્પર્ધાની વાતો કરે, પરંતુ તેના માટે અસલી પડકાર ત્રણ વિદેશી ખેલાડીઓ હતા. સાયનાએ આ ત્રણેયને 'ડરામણા' ગણાવ્યા હતા:
•    કેરોલિના મારિન (સ્પેન): જેની આક્રમક રમત હંમેશા સાયના માટે મુશ્કેલ રહી.
•    તાઈ ત્ઝુ યિંગ (તાઈવાન): જેની ચાલાકીભરી રમત સમજવી અશક્ય હતી.
•    વાંગ યિહાન (ચીન): સાયનાએ વાંગ યિહાનને પોતાની સૌથી મોટી 'શત્રુ' ગણાવતા કહ્યું કે, "તે ખરેખર ખૂબ ડરામણી હતી, તેની સામે જીતવા માટે દર વખતે લોહી-પાણી એક કરવા પડતા હતા."
નિવૃત્તિ પાછળનું કરુણ કારણ
સાયનાએ ખુલાસો કર્યો કે તેના ઘૂંટણમાં કાર્ટિલેજ (ગાદી) સંપૂર્ણપણે ઘસાઈ ગયા છે અને તેને સંધિવા (Arthritis) થઈ ગયો છે. 2016ના રિયો ઓલિમ્પિક દરમિયાન થયેલી ઈજા સાયના માટે કાયમી મુસીબત બની ગઈ હતી. સાયનાએ ભાવુક થતા કહ્યું, "મેં મારા માતા-પિતા અને કોચને કહી દીધું હતું કે હવે શરીર સાથ નથી આપી રહ્યું. મેં મારી પોતાની શરતો પર રમતમાં પ્રવેશ કર્યો હતો અને હવે શાંતિથી વિદાય લઈ રહી છું."
એક સુવર્ણ યુગનો અંત
પૂર્વ વિશ્વ નંબર-1 અને પદ્મ ભૂષણ વિજેતા સાયનાએ છેલ્લે 2023માં સિંગાપોર ઓપનમાં ભાગ લીધો હતો. 2012 લંડન ઓલિમ્પિકમાં બ્રોન્ઝ મેડલ જીતીને તેણે ઇતિહાસ રચ્યો હતો. અર્જુન એવોર્ડથી સન્માનિત આ ખેલાડીએ સ્પષ્ટ કર્યું કે તેને કોઈ ભવ્ય વિદાય સમારંભની જરૂર નથી, કારણ કે સમય જતાં લોકોને આપોઆપ સમજાઈ જશે કે સાયના હવે કોર્ટ પર જોવા નહીં મળે.
ભારતીય ખેલ જગત માટે સાયનાની નિવૃત્તિ એક યુગના અંત સમાન છે, જેણે અસંખ્ય યુવતીઓને હાથમાં રેકેટ પકડવા માટે પ્રેરણા આપી હતી.