મુંબઈ: ઝિમ્બાબ્વે અને નામિબિયાના યજમાનપદે રમાઈ રહેલા અંડર-19 વર્લ્ડ કપમાં ભારત અને બાંગ્લાદેશ વચ્ચે રમાયેલી હાઈ-વોલ્ટેજ મેચમાં રવિવારે એક નવો ઈતિહાસ રચાયો છે. આ મેચમાં એક સમયે બાંગ્લાદેશની ટીમ મજબૂત સ્થિતિમાં હતી અને ભારતની હાર નિશ્ચિત જણાતી હતી, પરંતુ ફિલ્ડિંગમાં વૈભવ સૂર્યવંશીના એક અવિશ્વસનીય પરાક્રમે આખી મેચનું પાસું ફેરવી નાખ્યું. વૈભવે બાઉન્ડ્રી લાઇન પર જે રીતે હવામાં ઉછળીને કેચ પકડ્યો, તેણે ક્રિકેટ પ્રેમીઓને 2024ના ટી-20 વર્લ્ડ કપમાં સૂર્યકુમાર યાદવે ડેવિડ મિલરનો પકડેલો એ ઐતિહાસિક કેચ યાદ અપાવી દીધો. આ એક ક્ષણે બાંગ્લાદેશના વિજય રથને રોકી દીધો અને ટીમ ઇન્ડિયાને રોમાંચક વિજય અપાવ્યો.

મેચમાં બાંગ્લાદેશને જીતવા માટે 47 બોલમાં માત્ર 59 રનની જરૂર હતી અને તેમની 7 વિકેટ સુરક્ષિત હતી, પરંતુ ભારતીય સ્પિનરો અને ફિલ્ડરોએ આક્રમક વ્યૂહરચના અપનાવી. 25મી ઓવરમાં જ્યારે બાંગ્લાદેશનો બેટ્સમેન સમ્યુન બસીર રતુલ વિજયી શોટ ફટકારવાની ફિરાકમાં હતો, ત્યારે લોંગ-ઓફ પર ઉભેલા વૈભવે જાદુ કર્યો. તેણે હવામાં છગ્ગા તરફ જઈ રહેલા બોલને પકડ્યો, સંતુલન ગુમાવતા પહેલા તેને હવામાં ઉછાળ્યો, બાઉન્ડ્રી લાઇનની બહાર જઈને તરત જ અંદર આવીને કેચ પૂર્ણ કર્યો. આ 'ગેમ-ચેન્જર' કેચ બાદ બાંગ્લાદેશની ટીમ પત્તાના મહેલની જેમ વિખેરાઈ ગઈ અને માત્ર 40 રનની અંદર પોતાની છેલ્લી 7 વિકેટ ગુમાવી દીધી.

માત્ર ફિલ્ડિંગ જ નહીં, પરંતુ બેટિંગમાં પણ વૈભવ સૂર્યવંશીએ પાયાની ભૂમિકા ભજવી હતી. જ્યારે ભારતના અન્ય દિગ્ગજ બેટ્સમેનો રન બનાવવા માટે સંઘર્ષ કરી રહ્યા હતા, ત્યારે વૈભવે માત્ર 67 બોલમાં 72 રનની આક્રમક ઇનિંગ રમી હતી, જેમાં 6 ચોગ્ગા અને 3 ગગનચુંબી છગ્ગા સામેલ હતા. તેને અભિજ્ઞાન કુંડુનો સાથ મળ્યો, જેણે 80 રનની શાનદાર ઇનિંગ રમી હતી. આ બંનેની જુગલબંધીને કારણે ભારતે નિર્ધારિત ઓવરોમાં 238 રનનો પડકારજનક સ્કોર ઉભો કર્યો હતો. વરસાદને કારણે મેચમાં ખલેલ પડતા બાંગ્લાદેશને 29 ઓવરમાં 165 રનનો સુધારેલો લક્ષ્યાંક આપવામાં આવ્યો હતો, જેની સામે તેઓ માત્ર 146 રન બનાવી શક્યા હતા.

આ જીત સાથે ભારતીય અંડર-19 ટીમે વર્લ્ડ કપમાં પોતાનું પ્રભુત્વ સાબિત કર્યું છે. સોશિયલ મીડિયા પર વૈભવ સૂર્યવંશીના કેચના વીડિયો વાયરલ થઈ રહ્યા છે અને ફેન્સ તેને 'જુનિયર સૂર્યા' તરીકે ઓળખાવી રહ્યા છે. દબાણની ક્ષણોમાં જે રીતે ભારતીય યુવા ખેલાડીઓએ સંયમ જાળવી રાખ્યો અને ફિલ્ડિંગમાં ચપળતા બતાવી, તે દર્શાવે છે કે ભારતીય ક્રિકેટનું ભવિષ્ય સુરક્ષિત હાથોમાં છે. બાંગ્લાદેશ સામેની આ જીતે પોઈન્ટ ટેબલમાં ભારતની સ્થિતિ મજબૂત કરી દીધી છે અને હવે આગામી મેચોમાં પણ ટીમ આ જ લય જાળવી રાખવા માટે આતુર છે.