વડોદરા | તા.13 : સંસ્કારી નગરી વડોદરાના મેદાન પર રવિવારે ભારત અને ન્યૂઝીલેન્ડ વચ્ચે રમાયેલી પ્રથમ વનડે મેચમાં એક વિચિત્ર સ્થિતિ જોવા મળી હતી. ભારતીય ટીમે ભલે શાનદાર જીત મેળવી હોય, પરંતુ રન મશીન વિરાટ કોહલી વડોદરાની ભીડના એક કૃત્યથી નાખુશ જણાયા હતા. મેચ દરમિયાન જ્યારે કેપ્ટન રોહિત શર્મા આઉટ થયો, ત્યારે સ્ટેડિયમમાં રહેલા દર્શકોએ દુઃખ વ્યક્ત કરવાને બદલે જોરદાર ચિચિયારીઓ પાડી ઉજવણી કરી હતી. આ ઉત્સાહ પાછળનું કારણ માત્ર એટલું જ હતું કે ચાહકો વિરાટ કોહલીને જલ્દી બેટિંગ કરતા જોવા માંગતા હતા.
"ધોની સાથે પણ આવું જ થતું હતું"
મેચ બાદ પોતાની પ્રતિક્રિયા આપતા વિરાટ કોહલીએ કહ્યું કે, "પ્રામાણિકપણે કહું તો, જ્યારે ઘરઆંગણાના દર્શકો પોતાના જ ખેલાડીના આઉટ થવાની ઉજવણી કરે ત્યારે જરાય સારું નથી લાગતું. મેં ભૂતકાળમાં એમએસ ધોની સાથે પણ આવું થતું જોયું છે. ભલે ચાહકોનો પ્રેમ બીજા ખેલાડી માટે વધુ હોય, પરંતુ જે બેટ્સમેન આઉટ થઈને પાછો જઈ રહ્યો હોય, તેના માટે આ સારી લાગણી નથી." કોહલીએ આ ઘટનાની તુલના આઈપીએલના વાતાવરણ સાથે કરી હતી, જ્યાં ધોનીને જોવા માટે અવારનવાર આવું બનતું હોય છે.
કોહલીની 93 રનની 'રોયલ' ઇનિંગ
જોકે, મેદાન પર ઉતર્યા બાદ વિરાટ કોહલીએ દર્શકોને નિરાશ ન કર્યા. તેમણે 91 બોલમાં 8 ચોગ્ગા અને 1 છગ્ગાની મદદથી શાનદાર 93 રન બનાવ્યા હતા. ભારત સામે 301 રનનો મોટો લક્ષ્યાંક હતો, પરંતુ કોહલીએ શુભમન ગિલ (56) અને શ્રેયસ અય્યર (49) સાથે મળીને ઇનિંગને મજબૂતી આપી હતી. ભલે વિરાટ પોતાની સદીથી માત્ર 7 રન દૂર રહી ગયા, પરંતુ તેમની આક્રમક બેટિંગને કારણે ભારતે 49 ઓવરમાં જ લક્ષ્યાંક હાંસલ કરી લીધો હતો.
ગ્રાઉન્ડ સ્ટાફનું દિલ જીત્યું
મેચમાં વિજય અપાવ્યા બાદ વિરાટ કોહલીએ મેદાનની બહાર પણ ચાહકોના દિલ જીત્યા હતા. તેમણે વડોદરાના BCA ગ્રાઉન્ડ સ્ટાફ સાથે મુલાકાત કરી હતી અને તેમની મહેનત બદલ આભાર માની ગ્રુપ ફોટો પડાવ્યો હતો. આ ઉપરાંત, નેટ પ્રેક્ટિસ દરમિયાન એક નેટ બોલરને ઓટોગ્રાફ આપીને પ્રોત્સાહિત કર્યો હતો. કોહલીએ કહ્યું કે, "હું મારું સપનું જીવી રહ્યો છું અને લોકોને હસતા જોઈને મને આનંદ થાય છે, પરંતુ રમત પ્રત્યેની ખેલદિલી જળવાઈ રહેવી જોઈએ."